মমাঙ চহী ২০২৩ গী মে অহুমদগি লমদমসিদা চিন-কুকি-জো কাঙলূপকি মিলিটেন্টশিংনা লমদমশিগী য়েলহৌমী অমা ওইরিবা মীটৈ কাঙলূপকি মথক্তা হীংশাগী ঈরাং চত্থরক্তুনা মীওই ২২০ হেন্না হাৎখ্রবা মতূংদা চৎলিবা জূন থা অসীগী তরুক্তা জিরিবাম শোরোক অতিংবি খূন্নৌদা লৈবা সোইবম শরতকুমার কৌবা অমা হাৎখিবা, মফম অদুদা লৈবা অমসুং জিরীবামগী অতৈ মফমশিংদা লৈবা খূঞ্জাশিংগী য়ূম চাম্মরোম মৈনা তুম্না থাদোকখিবা, অদুগা হন্দক লোক সভাগী মীখল মতূংদা কুকি মিলিটেন্ট শিংনা চত্থরক্লিবা হীংশাগী লিলা অসী ইন্দিয়া লৈঙাক্কি অরোনবা খূজিন থৌরাং অমগী মখাদা চত্থরকপা প্রোক্সি ৱার অমনি, মৈতৈশিংবু তুম্না মাঙহন্ননবা হোৎনরকপনি হায়বসি ময়েক শেংলক্লি হায়না ঈবুধৌ থাংজিং পানা গী মোইরাং সব-দিভিজনগী চিফ এদভাইজর এল গোপালনা পাউমীশিংগা উনবদা ফোঙদোকখ্রে।
মোইরাং কোনুং (কংলা) দা পাঙথোকখিবা পাউগী মীফম অদুদা মহাক্না হায়, কুমশিং ২০২৩ গী মে ২৯ দা য়ুনিয়ন হোম মিনিষ্টর অমিট শাহা মনিপুরদা লাক্লম্লবা মতূংদা সি আর পি এফকি চিফ কুলদিপ সিংহবু ষ্টেট অসীগী মায়োক্নরগা লৈরিবা হীংশাগী ঈরাং অসী লাকশীলহন্নবনি হায়দুনা সেক্যুরিটি এদভাইজর ওইনা হাপখ্রবসু মথৌ পাঙথোকপা ঙমদনা লৈরি। মরম অদুনা কুলদিপ অসী খূদক্তা থবক্তগী লৌথোক্কদবনি। মসী নত্রবদি মীয়াম্না অচৌবা পারা তম্বিরগনি হায়না গোপালনা ফোঙদোকখি।
কুকি মিলিটেন্ট শিংদা ফোংনা মতেং পাংশিন্দুনা অফবা খূৎলায় পায়বা মিলিটেন্টশিং অসীনা মৈতৈবু তুম্না মাঙহন্ননবা হোৎনরিবা আসাম রাইফলস হায়রিবা ওরগনাইজেসন অসী খূদক্তা লৌথোকখো, মদু নত্রবদি মীয়াম্না ঙকথী চপ্তুনা তান্থোরকপা য়াই হায়না মহাক্না ফোঙদোকখি।
