আসাম, মনিপুর, নাগালেন্দ অমসুং অরুনাচল প্রদেস হায়রিবা ৱেসিয়ান লমদমশিং অসীদা লৈরিবা মীয়াম্না ঙসীফাওবা নীংতম্না হিংবগী পুন্সি মরেল অদু ফংবা ঙমদনা লৈরি। চৈরকশিদা কোলোনিয়েলিষ্ট সিম্বোল অমা ওইরিবা ইন্দিয়াগী ইন্দিপেন্দেন্স ডে থৌরম অসিদা শরুক য়ারুবগী মথৌ অমত্তা তাদে। মরম অদুনা লাক্লিবা আগষ্ট ১৫ দা পাঙথোক্কদৌরিবা ইন্দিয়াগী ইন্দিপেন্দেন্স ডে থৌরম নুমিৎ অসিদা ৱেসিয়ান লমদমশিং অসীদা ব্লেক দেগী থৌরম পাঙথোক্তুনা বোয়কোট তৌরগনি লোয়ননা টোটেল শৎ- দাওন চত্থগনি হায়না আইন্না অথিংবা থমখ্রবা লূপ অনীনা প্রেসতা থাদোরকপা চেরোল অমনা খঙহল্লক্লি।
ৱেসিয়ান লমদমশিং অসীদা লৈরিবা মীয়াম্না মসীবু মপূঙফানা শৌগৎপীদুনা ঈশা-ঈশাগী য়ূমশিংদা লেঙদনা লৈবিয়ু, মপান্দা থোকপিরক্কনু হায়না য়ুনাইটেদ লিবরেসন ফ্রন্ট ওফ আসোম- ইন্দিপেন্দেন্স ( ঊলফা-আই) অমসুং নেস্নেল সোসিয়েলিষ্ট কাউন্সিল অব নাগালিম-য়ুং আউং (এন এস সি এন-ৱাই এ) গী অপূনবা প্রেস রিলিজ অদুদা ফোঙদোকখি।
ইন্দিয়াগী ইন্দিপেন্দেন্স ডে থৌরম পাঙথোক্কদৌরিবা নুমিৎ অসীদা মীয়াম্না ৱান পিপল, ৱান রিজন ৱান ভিজন হায়বা স্লোগান লাউবিয়ু হায়না ফোঙদোরক্লি। নুমিৎ অসীগী অহীং নোংয়াইদগী নুমিদাং পূং ৮ তাবফাওবা টোটেল শৎ-দাওন চত্থগনি হারকপগা লোয়ননা মেদিয়া, ইসেন্সিয়েল সার্বিসশিং অমসুং লাইনিং-লাইশোনগা মরী লৈনবশিংদি কোমথোক্কনি হায়রি।
