ঊখ্রূলদা মীজলস লায়না শন্দোরকপা থেংনরে, পাকসন্না শন্দোরক্কদ্রা হায়বগী চিংনবা লৈরে

উখ্রুল সহরগী রাইওতাং এরিয়াদা মীজলস লায়না শন্দোরকপা থেংনরে। লায়না মখল অসী অতৈ মফমশিংদসু পাক সন্না শন্দোরক্কদ্রা হায়বগী চাউনা চিংনবা লৈরে হায়রি। সেনিয়র মেদিকেল ওফিসার অমসুং দিষ্ট্রিক্ট ইম্মুনাইজেসন ওফিসার দাঃ পামজা লুইখম্না পীরকখিবা রিপোর্ট মতূং ইন্না চৎলিবা চহী অসিগী মার্চ ১৯ দা লমদম অদুগী অঙাংশিংদা মীজলস লায়না লাইওং মানবা কেস অমা অহানবা ওইনা থেংনরকখি। মদুগী মতাংদা চিংনবা লৈবদগী সেম্পল লৌদুনা গুৱাহাটিদা চপ চাবা অমা খঙদোক্নবগীদমক থাখি। হৌজিক সেম্পল অদুগী রিপোর্ট ফংবগা লোয়ননা মীজলস লায়নানি হায়বসু খঙবা ঙম্লে হায়না ফোঙদোকখি।

ঊখ্রূলগী তোঙান তোঙানবা মফমশিংদা অঙাংশিংদা লাইহৌ তৌবা অমসুং ঊন্সাদা মহৌশাগা মান্নদবা লাইওং কয়া ঊৎলকপা থেংনরি। মসীনা মরম ওইদুনা অতৈ মফমশিংদসু পাক সন্না শন্দোরক্কদ্রা হায়বগী মিপাইবা লৈবদগী চেকশীন থৌরাং অকনবা মওংদা লৌখৎপা হৌরে হায়রি। মীজলস হায়রিবা লায়না মখল অসি অঙাংশিংদা য়াম্না লায়না অথুবা মতমদা শন্দোক্কনবা ওইবনা ষ্টেট লৈঙাক্না অথুবা মতমদা মীৎয়েং চঙদুনা ঙাকথোক্নবা হোৎনহৌবগী তঙায়ফদবা লৈ হায়নসু মহাক্না মখা তানা ফোঙদোকখি। অঙাংশিং অদু স্কুলনচিংবদা চৎহন্দনা মশা মশাগী য়ূমদা লেঙদনা লৈহন্নবা হোৎনবগা লোয়ননা লাকশীন্নবসু অকনবা খোঙথাং লৌখৎপা হৌরে হায়রি।

মরী লৈনবা মীয়াম্না অথূ-অকাইগীদমক মোবাইল নম্বর ৯৬১২৫২০৩২৩  দা পাউ পীরকপা য়াগনি হায়রি। কা হেন্না লৌনগনবা লায়না মখল অসি তৌরবদি লোক খূবা, লাইহৌ তৌবা, মিত্তা কঞ্জংতিবাইটিস লাকপা অমসুং ঊন্সাদা অহোংবা কয়া লাকপা থেংনগনি হায়রি।