তোতোমসনাগী মথক্তা এক্সন লৌননবা মরী লৈনবা অথোরিটিদা ৱাকৎখ্রে

ইন্নর মণিপুর পারলিয়ামেন্টরি কন্সটিট্যুয়েন্সিগী মীরেপ অমা ওইরিবা তোতোমসনানা হন্দক পাঙথোকখিবা মীরেপশিংগী মিট অমদা ফজদবা ৱাহৈ ৱাতা শীজিন্নদুনা ৱাফম খরা ফোঙদোকখিবা অদুগী মতাংদা ইম্ফাল ইষ্ট দিষ্ট্রিককি দেপ্যুটি কম্মিস্নার খুমন্থেম দাইনানা ইম্ফাল নোংচুপ পানাগী পুলিসকি এস পিদা তোতোমসনাগী মথক্তা এক্সন লৌখৎনবা খঙহনখিবা মতূং বি জে পি মনিপুর প্রদেসকি জেনরেল সেক্রেটরি কে শরতনা মনিপুরগী চিফ ইলেক্তোরেল ওফিসার অমসুং রিটর্নিং ওফিসারদা ৱাকৎ চেরোলশিং পীশীন্দুনা অকনবা এক্সন তোতোমসনাগী মথক্তা লৌখৎনবা খঙহনখ্রে হায়রি।
মসী থারগা তোতোমসনাগী মথক্তা এক্সন লৌখৎনবা কমপ্লেন্ট থাঙ্গৎলকপগী থৌদোক অসী অনি শুরে। হৌখিবা নুমীৎ নীনিগী মমাঙদা হোটেল ইমফালদা মনিপুরগী ও টি টিদা স্ত্রিমিং তৌবা টি ভি চেন্নেল অমনা শীন্দুনা পাঙথোকখিবা ইন্নর অমসুং আউটর মনিপুরগী মীরেপশিং উনবগী মেগা দিস্কসন থৌরমদা ১৮ শুবা লোক সভা মীখলগী শরুক অমা ওইনা ইন্নর মনিপুর পারলিয়ামেন্টরি কন্সটিট্যুয়েন্সিদা ইন্দিপেন্দেন্ট মীরেপ অমা ওইরিবা তোতোমসনা নোংশাবনা ষ্টেট অসিগী চিফ মিনিষ্টরবু হাৎকনি হায়না ফোঙদোরকখিবা মতূংদা মহাক্কী মথক্তা কমপ্লেন্ট কয়া থাঙ্গৎনরকখিবনি।
ৱাকৎ চেরোল পীশীনখিবা অদুগা মরী লৈননা কে শরতনা পাউমিশিংদা হায়, ফ্রিদম ওফ স্পিচকি মরুমদা ষ্টেট অমগী চিফ মিনিষ্টর অমবু হাৎকনি হায়দুনা খ্বাইদগী হেন্না লৈবাক মচা তাদবা ৱাহৈ-ৱাতা শীজিন্নখিবা অদু য়াম্না লাইবক থীবা অমনি। থৌরম অদুবু শীল্লিবা মেদিয়া চেন্নেলনসু তৌবা য়াবা য়াদবগী অকনবা নিতি-নিয়ম শেমদুনা থমগদবনি অদুবু মদু তৌদবগীদমক তেকচাক পুফম থোকপনি হায়খী।প্রোগ্রাম অদুগী লিমিটেসন অমসুং পেরামিটর থমদবদগী লমহেন-তুহেনবা মীওই অদুনা হায়নীংবা-ঙাঙনিংবা ৱাফম পঙহায় হায়বদা য়াহনখিবনি হায়না শরতনা অশাওবা ফোঙদোকখি।
মতূং তারকপদসু অসীগুম্বা প্রোগ্রাম শীনবা মতমদা মাঙজৌননা লিমিটেসন অমসুং পেরামিটরশিং হান্না নিংথীজনা য়াত্তুনা থমগদবনি হায়খি।অসীগুম্বা পেরামিটর অমত্তা থমদবদগী তোতোমসনা হায়রীবা মীওই আদুনা ঙাঙনীংবা ঙাঙথোকপা ঙমখিবনি। মরম অদুনা শীল্লি-লাঙলিবশিংগী মথক্তসু এক্সন লৌখৎননবা কমপ্লেন্ট তৌরে হায়না শরতনা মখা তানা ফোঙদোকখি।