ঙরাং নুংদাং মনিপুরগী তোঙান তোঙানবা মফম কয়াদা মৈরা পায়বী ঈমাশিংনা লম্বীদা মশীং য়াম্না থোক্নরক্তুনা, খূত্তা মৈরা পায়দুনা মনিপুরগী শক্তম করিগুম্বা ফীভম অমত্তগী মখাদা কায়হনবা য়ারোই হায়বা অকনবা খোল্লাউশিংগা লোয়ননা মৈরাগী রেল্লি পাকসন্না চত্তুনা প্রোটেষ্ট তৌখ্রে। চৎলিবা থা অসীগী ৮দসু ঈমা মৈরা পায়বীশিংনা তিদ্দিম লাইন্দা মৈরাগী রেল্লি চত্তুনা ইম্ফালগী কৈশাম্পাৎ য়ৌশিল্লকপদা মনিপুর পুলিসকা চাউনা মূক্নবা থৌদোক লৈখ্রবনি।
ঙরাং নুংদাং চাউরাক্না পূং ৭ লোম তাবদগী থাংমৈবন্দদা লৈরিবা থাউ গ্ৰাউন্দদগী মশীং য়াম্লবা ঈমাশিংনা খূত্তা মৈরা পায়দুনা মনিপুরগী শক্তম করিগুম্বা ফীভম অমত্তগী মখাদা কায়হনবা য়ারোই হায়দুনা অচৌবা খোঙচৎ অদূ চৎখিবনি। ইম্ফাল সহরগী অকোয়বা মফম কয়াদা মৈরাগী খোঙচৎ অদূ পাঙথোকখি।
মনিপুরগী শক্তম কায়বা য়ারোই, কুকিশিংদা সেপরেট এদমিনিষ্ট্রেসন পীবা য়ারোই, কুকি-জো মাইগ্ৰেন্টশিংনা চত্থরক্লিবা টেরোরিজম খূদক্তা লেপহনগদবনি, মনিপুরদা এন আর সি চৎনহনগদবনি, কুকিশিংদগী এস টি ষ্টেটস লৌথোক্কদবনি, কুকি শিংনা চত্থরক্লিবা দ্রোন বোম্বিং, রোকেট প্রোপেল্ড বোম্বিং অমসুং মিসাইল এত্তেক অসী ইন্দিয়াগী সেক্যুরিটি, ইন্টিগরিটি, সোভরেন্টিদা শীংনরকপনি, মসী খূদক্তা লাকশীন্দুনা মখোয়বু ইন্দিয়াগী ঙমখৈ ৱাংমদা তকথোক্কদবনি হায়বা খোল্লাউশিং ঈমাশিংনা লাউখি।
