মুস্লিম কাঙলুপনা মশীং হেন্না খুন্দারিবা আসামগী ধূব্রি লোক সভা সিট্টা লাক্তুনা কনাগুম্বা মীরেপ অমত্তাগী ভোৎ খোম্লোই হায়না মমাঙদা ফোঙদোকখিবা ষ্টেট অদুগী চিফ মিনিষ্টর হিমন্ট বিশ্বা শর্ম্মনা ঙরাং খঙহৌদনা লোক সভা সিট অসিদা লাক্তুনা বি জে পি গী এল্লাই অমা ওইরিবা আসোম গন্ন পরিষদ ( এ জি পি) কি কেন্দিদেট ইস্লামগী ফেবরদা মীয়ামদগী ভোৎ নিখ্রে। মহাক্না গৌরিপুর, বিলাসিপরা অমসুং গোলাকগঞ্জ দা পাঙথোকপা পব্লিক মীটিং অহুমদা ৱা ঙাঙখি।
ধূব্রি লোক সভা সিটকি মনুংদা লৈবা এসেমব্লি সেগমেন্ট ১১ গী মনুংদা মফম অহুম অসীসু য়াওরিবনি। এসেমব্লি সেগমেন্ট অহুম অসিদা মমাঙদদি মীয়াম্না থোইনা ইন্টরেষ্ট লৈনরমদবনি অদুবু হন্দক্তি বি জে পি অমসুং মসীগা চৎমিন্নরিবা এ জি পি দা মীয়াম্না নোংমা নোংমগী শৌগৎনরকপগী মশীং অসি শীংথানিঙায় ওইনা হেঙ্গৎলক্লি হায়না হিমন্টনা ফোঙদোকখি। লোক সভা সিট অসীগী সিট্টিং এম পি বাদ্রুদ্দিন আজমলগী মতম লোইরে হায়বা মায়কৈ অদুগী মীয়াম্না খঙনরকপগা লোয়ননা কংগ্রেস পার্টিসু মফম অসিদা কান্নররোইদবা অমনি হায়বসু ধূব্রিগী মীয়াম্না ময়েক শেংনা খঙনরক্লে হায়না মহাক্না ফোঙদোকখি ।
মুস্লিম কাঙলুপনা মেজোরিটি ওইরিবা আসামগী ধূব্রি লোক সভা সিট, বারপেটা লোক সভা সিট অমসুং অতোপ্পা লোক সভা সিট অমগা থারগা সিট অহুমদি মুস্লিম কাঙলুপনা দোমিনেট তৌদুনা লৈরিবনি। এ জি পিনা ধূব্রি অমসুং বারপেটা লোক সভা সিটতা, অদুগা বি জে পিগী অতোপ্পা এল্লাই অমনা মূস্লিম্না নম্না তারিবা অতোপ্পা লোক সভা সিট অমদা মীরেপ থিদোক্তুনা লম্বাশিং থেংনরিবনি।আসামগী লোক সভা সিট ১৪ গী মনুংদা বি জে পি না সিট ১১ দা মীরেপ থাদোক্লি।এ জি পিনা বারপেটা অমসুং ধূব্রি লোক সভা সিটতা মীরেপ থাদোক্লি অদুগা য়ুনাইটেদ পিপলস পার্টি লিবরেলনা সিট অমদা মীরেপ থাদোক্লি।লোক সভা মীখল অসীগী অহুমশুবা তাঙ্কক্কি মীখল থা অসীগী তরেত্তা পাঙথোক্কদৌরিবা অসিদা ধূব্রি লোক সভা সিটকিসু মীখল পাঙথোক্কদৌরিবনি।
