থৌবালদা লৈবা বিল্লিয়ন একাদেমি হায়না খঙনবা লন্নাই স্কুল অমদা প্রিন্সিপাল ওইনা থৌ পুদুনা, হৌরক্লিবা মহৈরোয়শিং তাকপী-তম্বিদুনা তুংগী অফবা, ছূম চাদবা মীরোল অমা শেমগৎলিবনি হায়দুনা মহৈরোয়শিং অমসুং গার্জিয়ানশিংনা য়াম্না থাজবগা লোয়ননা ঈকায় খুম্নরিবা ওজা অমনা শাশিন্ন বা দোক্যুমেন্টশিং পায়রগা বোর্দ ওফ সেকেন্দরি ইদ্যুকেসন মনিপুর (বোসেম) গী ক্বেসন সেট্টরনি অমসুং ঐচ এস এল সি ইগজাম পাঙথোক্কদৌরিবা অসীগী ওবজার্ভর অমসু ওইরিবনি হায়জীন্দুনা শেন্দাল লম্বী চত্থরম্বদগী মীয়াম্না খঙনরকপদগী ফাগত্তুনা পুলিসকি কষ্টদিদা য়ৌখ্রে।
দেসামগী মহৈরোয়শিংনা রেইদ চত্থরক্তুনা ফাগৎখিবগা লোয়ননা পুলিস কষ্টদিদা য়ৌখ্রবা মীওই অদুগী মমিং লাইশ্রম রাজেস কৌই। মহাক থৌবালদা লৈবা বিল্লিয়ন একাদেমি হায়না খঙনবা লন্নাই স্কুল অমদা প্রিন্সিপাল ওইনা থৌ পুরিবা মীওইনি হায়রি।অঙাঙশিংগী পুন্সিগী অফবা তুংলমচৎ অমা শেম্ননবা মহৈ- মশিন তম্বি-তাকপীবদা চাউনা থৌদাং লৌননবা চোংথোক্লক্লিবা মীশক অমনি। মহাক মশামক হন্দক পাঙথোক্কদৌরিবা বোসেম্না লৌবা ঐচ এস এল সি ইগজামিনেসন অসীদা ওবজার্ভর ওইগদবা মীশক্নি অদূগা ইগজাম অসীগী ক্বেসন সেত্তর অমসু ওইরিবনি হায়বগী অশাবা দোক্যুমেন্টশিং পায়রগা মীয়াম অমসুং মহৈরোয়শিং দগী শেন্দাল লম্বী চত্থননবা থৌরাং তৌরম্বনি হায়রি।
মহাক দেসামগী থৌমীশিংনা পাউমীশিংগী মমাঙদা পুথোকখি। মহাক্না লঙজরুরিবা মরালশিং অদূ মীয়াম, লৈঙাক অমসুং মরী লৈনবা ষ্টেকহোল্ডরশিংনা ঙাকপীয়ু, মতূংদা অসীগুম্বা অরানবা থবক অমত্তা তৌজররোই হায়না মশানা ফোঙদোকখি। মদুগী তুংদা মনিপুর পুলিসকি কাঙবূ অমনা মহাকপু ফারগা পুখি।
