তোঙান তোঙানবা পোলিটিকেল পার্টি তরামঙানা পূন্দুনা শেম্বা নেস্নেল দিমোক্রেটিক এল্লায়েন্স ( এন দি এ) কি লুচিংবশিংনা মীফম অমা পাঙথোক্তুনা ন্যু দিল্লিদা খন্না-নৈনরবা মতূংদা প্রাইম মিনিষ্টর নরেন্দ্র মোদিবু অহুম্লক শুবা টার্মগী ওইনা এন দি এ গী লুচিংবা অমসুং প্রাইম মিনিষ্টর ওইনবা মোৎ অমত্তা ওইনা য়ানখ্রে। প্রাইম মিনিষ্টর নরেন্দ্র মোদিগী লমজীং মখাদা অমত্তা ওইনা পূন্না লোক সভা মীখল থেংনমিন্নরবা মতূংদা মায় পাক্লকখিবদগী অহুম্লকশুবা টার্মগী লৈঙাক অমা শেম্ননবা থৌরাং তৌরি হায়না এন দি এগী লুচিংবশিংনা ফোঙদোকখি।
মীফম অদুদা বিহারগী চিফ মিনিষ্টর অমসুং জনটা দল (য়ুনাইটেদ) কি লুচিংবা নিটিস কুমার, টেলুগু দেসাম পার্টিগী সুপ্রিমো চন্দ্রবাবু নাইদু, মহারাষ্ট্রগী চিফ মিনিষ্টর অমসুং সিব সেনাগী লিদর একনাথ সিন্দেনচিংবা লুচিংবা কয়াসু শরুক য়াখিবগা লোয়ননা মোদিগী লমজিং মখাদা পূন্না থবক তৌমিন্ননবা অমত্তা ওইনা য়ানখি।
প্রাইম মিনিষ্টর নরেন্দ্র মোদিনা কৌদুনা পাঙথোকখিবা মীফম অদুদা তোঙান তোঙানবা এন দি এগী লুচিংবা ২১ না শরুক য়াখি। হৌখিবা চহী তরাগী মতমসিদা সেন্টরগী এন দি এগী লৈঙাক্না পিপলস পোলিসিদা য়ূম্ফম ওইবা থবক থৌরমশিং পায়খত্তুনা লৈবাক অসীবু মাঙলোমদা পুখৎলক্লিবা কয়া অসীদা লৈবাক অসীগী মীয়াম্না মখা তানা লৈঙাক চল্লাইনবা মেন্দেট অসী পীরকপনি হায়না লুচিংবা কয়ানা ফোঙদোকনখি।
