মনিপুরগী এম পি অনীমক ৱাশক লৌখ্রে, লমদমসিগী ইস্যু পুখৎনবা শেম শাবা হৌখ্রে

মালেমদা খ্বাইদগী চাউরবা দেমোক্রেসি চৎপা লৈবাক অমা ওইরিবা ইন্দিয়াগী তরানিপালশুবা লোক সভা মীখল লোইখ্রবা মতূংদা মনিপুরগী ইন্নর অমসুং আউটর লোক সভাগী সিট অনীমক্তা য়াম্না চাউনা মায় পাকখ্রবা কংগ্রেস পার্টিগী এম পি অনীমক ঙরাং লোক সভাগী এম পি ওইনা ৱাশক লৌখ্রে।
দা. অঙোমচা বিমোল অকোয়জমদি মনিপুরি লোল, ঈমালোন্দা ৱাশক লৌখি অদুগা অলফ্রেদ কাঙম অরথরদি ইংলিস লোন্দা ৱাশক লৌখি। থা অসিগী কুন্মরিদগী এন দি এ গী অহুমশুবা লৈঙাক্কি অহানবা পারলিয়ামেন্ট মীফম হৌখিবনি। রাজ্য সভাগী মীফমনা চৎলিবা থা অসীগী কুন্তরেৎতগী হৌগদবনি। মীফম অসী লাক্লিবা জুলাই অহুমফাওবা পাঙথোক্কনি হায়রি।
পারলিয়ামেন্টকি মেম্বরশিং ৱাশক লৌবগী থৌরম অদু আলফাবেটিকেল ওর্দরদা পাঙথোকখিবনি। ঙরাং নীনী চনবা নুমিত্তা এম পিশিং অরোয়বা ওইনা ৱাশক লৌখি। মদুদা মনিপুরগী এম পি অনীশু ৱাশক লৌখিবনি। লোক সভাগী প্রোটেম স্পিকর ভরত্রহরি মহাতাবনা এমপিশিং মথং মনাউ নাইনা ৱাশক লৌখি। ইন্নর মনিপূর পারলিয়ামেন্টরি কন্সটিট্যুয়েন্সিদগী চাউনা মায় পাকখ্রবা দা. অঙোমচা বিমোল অকোয়জম্বু্ ৱাশক লৌনবগীদমক প্রোটেম স্পিকরনা কৌখৎলকপা মতমদা লোক সভাগী মেম্বরশিংনা মনিপুর, মনিপুর হায়বা খোল্লাউশিং লাউদুনা হাওস অদু পূমনিল নিনখি।
মহাক্কি মায়থোঙদা মমালোলদা ৱাশক লৌজবগী চাউথোকচবা, পেঞ্জবগী, নুঙাইজবগী মমি তাখি। মহাক্কি মথংদা আউটরগী এম পি অলফ্রেদ কাঙম অরথরসু কৌখৎলকখীবগা লোয়ননা ইংলিস লোন্দা ৱাশক লৌখি।