ষ্টেট লৈঙাক্কি মখাদা মীয়াম অমসুং লৈঙাক অনীগী মরক্তা ঈ-পাউ ফাওদোক্নদুনা ট্রান্সপরেন্ট ওইবা সাসন অমা চল্লাইননবা, মীয়ামগী চাওখৎ-থৌরাংশিংগী মরমদা অমদি মীয়ামগী পেন্দবা কয়াগী ৱাকৎ ফোঙদোক্নবগী লিঙ্ক থমদুনা মরূওইবা থৌদাংশিং লৌরিবা দিরেক্তরেট ওফ ইনফোর্মেসন এন্দ পব্লিক রিলেসন্স (দি আই পি আর) না শাফোঙলকখিবগী ৭৬শুবা কুম্মোন পালনগা মরী লৈননা চৎলিবা নবেম্বর থা অসীগী অমদা নীংশীং থৌরম পাঙথোকখ্রে।
মনিপুর লৈঙাক্কি আই পি আর, হেল্থ এন্দ ফেমিলি ৱেলফিয়র মিনিষ্টরনা অথোয়বা মীথূংলেন ওইদুনা ইম্ফালগী নিত্যাইপাৎ চুথেক্তা লৈবা দিরেক্তরেট অসীগী ময়ায় লোয়শঙদা পাঙথোকখিবা আই পি আর দে গী থৌরম অদুদা ষ্টেট লৈঙাক্কি আই পি আর অমসুং আর্ট এন্দ কলচরগী কম্মিস্নার এম জয়, আই পি আরগী দিরেক্তর ওইনা থৌ পুরিবা দা. টি ঐচ চরঞ্জিৎসু শরুক য়াখি।
আই পি আর অসী লৈঙাক অমসুং মীয়ামগী মরক্তা ঈ-পাউ ফাওদোক্নদুনা লমদম অসীবু চাওখৎ মায়কৈদা পুখৎলক্নবা থবক তৌদুনা লৈরিবা, য়াম্না মরুওইরবা দিপার্টমেন্ট অমনি। লোয়শঙ অসীগী ষ্টাফশিংনা লমদম অসীগী মেদিয়াপার্সনশিংগা মপূঙফানা কোওপরেসন পীনদুনা অমদি কোর্দিনেট তৌনদুনা লৈঙাক্না মতম মতমগী ওইনা মীয়ামগী অমসুং ষ্টেট অসীগী তুংগী য়াইফনবা পায়খৎলিবা চাওখৎ থৌরাংশিংগী মতাংদা গ্ৰাসরুট লেভেলদা ঈ-পাউ য়ৌহন্ননবা হোৎনবিয়ু হায়না আপিল তৌখি।
