মমাঙগী চহী ২০২৩গী মে অহুমদগী হৌরকখিবা মনিপুরগী অকনবা হীংশাগী ঈরাং অসীগী মতাংদা হোম এফ্যার্স মিনিষ্ট্রিগী রিভ্যু মিটিং অমা পাঙথোক্তুনা ৱাফম কয়া খন্নখ্রে। য়াম্না মরুওইরিবা মীফম অদুদা মনিপুরগী চিফ মিনিষ্টর নোংথোম্বম বিরেন করিগী য়াওখিদবনো হায়না কংগ্রেস লুচিংবা পাৱন খেরানা অকনবা ৱাফম ফোঙদোকখি। চিফ মিনিষ্টর বিরেন য়াওখিদবদু পেন্দবা ফোঙদোক্লদুনা, সেন্ট্রেল গভর্নমেন্ট না মখোয় মশাগী চিফ মিনিষ্টর অমগী মথক্তা নো-কনফিদেন্স মোসন লৌখৎপগী থৌওং অমরা হায়বা ৱাফমসু থমখি।
চিফ মিনিষ্টর বিরেন য়াওখিদবদুনা মরম ওইদুনা ৱাহং কয়ামরুম লৈহল্লে হায়না খেরানা মখাতানা ফোঙদোকখি। রিভ্যু মিটিং অদুদা মরূওইনা মনিপুরদা হৌজিক ওইরিবা সেক্যুরিটিগী মতাংদা পুখত্তুনা খন্নখি। ষ্ট্রেটেজিক ওইবা মওংদা অহেনবা সেক্যুরিটি পার্সনেলশিং মনিপুরদা থাজিন্নবগী হীরমদসু মীফম অদুদা নৈনখি হায়রি। মথৌ তারবদি মনিপুরদা হৌজিক লৈরিবা সেক্যুরিটি পার্স নেলশিং অসীগী মথক্তা মখাতানা অহেনবা ফোর্স থাজিন্নবসু ফোঙদোক্নখি।
ঈরাং অসীদা কাইহৌরকপা মীওইশিংগী মথক্তা অকনবা আইনগী ওইবা এক্সন লৌখৎনবা য়ুনিয়ন হোম মিনিষ্টর অমিট শাহানা সেক্যুরিটি এজেন্সিশিংদা অকনবা পাউতাক পীখি হায়রি। মীফম অদুদা মনিপুরগী চিফ সেক্রেটরি, দি জি পি, ষ্টেট লৈঙাক্কি সেক্যুরিটি এদভাইজরসু শরুক য়াখি অদুগা য়ুনিয়ন হোম সেক্রেটরি অজয় ভালা, ইন্টলিজেন্স ব্যুরোগী চিফ তপন দেকা, আরমী চিফ জেনরেল মানোজ পান্দেনচিংবা শরুক য়াখি।
