ফেক্তরিগী রিয়েক্তর পোকখায়বদা মঙা শিরে,১০ শোক্লে

টেলঙ্গনাগী শঙ্গরেদি লমদমদা কেমিকেল ফেক্তরি অমদা লৈবা রিয়েক্তরশিং পোকখায়দুনা মৈ চাক্লকখিবা থৌদোক অমদা য়ামদ্রবদা মীওই মঙা শিখ্রে অদুগা মীওই তরারোম অশোক- অপন মায়োকনখ্রে হায়রি। ফেক্তরি অদুদা হৌজিক ফাউবা মীওই কয়া অমসু থোক্লকপা ঙমদনা লৈরিবা মরম্না অশীবা মীওইগী মশীং হেঙ্গৎলকখিগনি হায়বগি থাজবা ৱাংনা লৈরি হায়রি।
রিয়েক্তর পোকখায়রকখিবা মতমদুদা ফেক্তরি অদুদা য়ামদ্রবদা মীওই ৫০ রোম থবক শূদুনা লৈখি হায়না মফম অদুগী মীওইশিংনা ফোঙদোকখি। অনকপদা লৈবা মীওইশিংনা থাদোক্নরকখিবা ভি দি ও গী মতূং ইন্না রিয়েক্তর পোকখায়রকখিবা মতমদুদা ফেক্তরি অদুদগী অচৌবা মৈবূল অমসুং অথাবা অমম্বা মৈখূগী মপৈ কয়া অতীয়া তম্না য়াম্না ৱাংনা কাপখৎলকপা মীয়াম্না উবা ফংনখি।
য়েংবদা খ্বাইদগী অকিবা অমসুং তুজুংবগী মশক ওইখি হায়রি। অঙাঙবা অচৌবা মৈবূলগী বোল অমা অতিয়া তম্না পাইখৎলকপগী মওংদা মীয়াম্না মৈবূল অদুবু য়াম্না ঙক্না য়েংনখি হায়রি। শিখ্রবা মীওইশিং অদুগী মনুংদা ফেক্তরি অদুগী মেনেজরসু য়াওখ্রে হায়না পাউগী লীখূন অমনা ফোঙদোকখি। ফেক্টরি অদুদা অতোপ্পা রিয়েক্তর অমসু লৈরিবা মরম্না মদুসু মখা তানা পোকখায়রকপা য়ারি হায়না লমদম অদুগী মীয়াম্না য়াম্না কন্না মিপাইবা পোকনরি।
মরী লৈনবা অথোরিটিশিংনা থৌদোক অদুদা লৈখিদ্রবা অমসুং অশোকপা মীওই কয়া অতোপ্পা মফমদা হোন্দোরকপগী থবক চত্থরি হায়রি। অশোকপা মীওইশিং অদু মনাক নকপা হোস্পিটালশিংদা পুখত্তুনা লায়কন্নবগী থবক লৌখৎখ্রে।