অনৌবা বদজেট্টা য়ুনিয়ন হেল্থ মিনিষ্ট্রিগীদমক ক্রোর ৯০,৯৫৮ এল্লোকেসন পীখ্রে

য়ুনিয়ন বদজেট ২০২৪-২৫ ঙরাং পারলিয়ামেন্টতা ফাইনান্স মিনিষ্টর নির্মালা সিতারমন্না পুথোকখিবগা লোয়ননা হেল্থ মিনিষ্ট্রিগী ওইনা অপূনবা শেনফম লূপা ক্রোর ৯০,৯৫৮.৬৩ এল্লোকেসন পীখ্রে।
এল্লোকেসনগী শেনফম অসী শেনবা চহী ২০২৩-২৪ গী ওইনা কাইথোকখিবা ক্রোর ৮০,৫১৭.৬২ দা এল্লোকেসন পীখিবা অদুদগী চাদা ১২.৯৬ হেঙ্গৎলবনি হায়রি। হেল্থ মিনিষ্ট্রিগীদমক কাইথোকলিবা এল্লোকেসন অসীগী মনূংদগী দিপার্টমেন্ট ওফ হেল্থ এন্দ ফেমিলি ৱেলফিয়রগী লূপা ক্রোর ৮৭,৬৫৬.৯০ অদুগা দিপার্টমেন্ট ওফ হেল্থ রিছার্স কি ওইনা ক্রোর ৩,৩০১.৭৩ নি।
হন্দক্কি বদজেট অসীদা কেন্সর লায়েংবদা শীজিন্নরিবা দ্রগ মখল অহূমদা লৌরম্বা কষ্টম্স দ্যুটি কোকথোক্লগনি হায়রি। দ্রগশিং অদুদি ট্রাষ্টুজুমেব দেরক্সটিকান, ওসিমর্টিনিব অমসুং দর্বেল্যুমেব হায়রিবা অহুম অসিনি। এক্স-রে ট্যুব অমসুং ফ্লেট পেনেল দিটেক্তরশিংদা লৌবা বেসিক কষ্টম্স দ্যুটি সু অহোংবা লৈরগনি।
আয়ুস মিনিষ্ট্রিগী বদজেট এল্লোকেসনসু হান্না লূপা ক্রোর ৩,০০০ ওইরম্বদগী হন্দক্না হেঙ্গৎলক্তুনা ক্রোর ৩,৭১২.৪৯ ওইরে। দিপার্টমেন্ট ওফ হেল্থ এন্দ ফেমিলি ৱেলফিয়র গী স্কিমশিংগী বদজেট এল্লোকেসন ক্রোর ৭৭,৬২৪.৭৯ ওইরম্বদগী ৮৭,৬৫৬.৯০দা হেঙ্গৎখ্রে।
নেস্নেল হেল্থ মিসনগী বদজেট এল্লোকেসন না হন্দক্কি বদজেট অসীদা ক্রোর ৩৬,০০০ ওইরে। মসী মমাঙদদি ক্রোর ৩১,৫৫০.৮৭ ওইরম্বনি।