ইম্ফাল-মোরে লম্বীগী লিলোং থোংজাউদগী উশোইপোকপী ফাওবগী ওইনা লৈরিবা লম্বী পরীং অসী মতম কক্তনা থিংজিল্লগনি হায়না লিলোং এরিয়াদা লৈরিবা ভল্লন্টরি য়ূথ ক্লব মাপননা পূন্সীন্দুনা শেমখিবা জোইন্ট এক্সন কম্মিটি (জে এ সী) না লাউথোকখ্রে।মমাঙদসু মনিপুরগী মফম কয়াদা লৈরিবা ক্লব অমদি মৈরা -লূপশিংনা লম্বী ফত্তবগী অমদি থক্ননবা ঈশীং ফংহন্দবগী মতাংদা লম্বী থিংবা, সীট-ইন-প্রোটেষ্ট চত্থবগী থৌওংশিং চত্থবা কয়ামরূম লৈখ্রবনি।
লৈঙাক্না মীয়ামগী থবক পায়খৎলি, চাওখৎ-থৌরাংশিং লেপ্তনা লৌখৎলি হায়না তত্তনা লাউরি, লৌখৎপসু উরিবনি মীয়াম্না। অদূম ওইনমক মীওইবনা হিংবা অমসুং শিবগা শাগোন্নরিবা চাক-ঈশীঙগী হীরমশীমদি অতৈ হীরমশিংদগী তোঙানবা মীৎয়েং থমদুনা থবক পায়খৎফম থোকপনি হায়রক্লি।মসীদি কক্নিঙায় ওইদ্রি। অফবা চীঞ্জাক মখলশিং মরাঙ কায়না মীয়ামদা ফংহনবা, লম্বী-থোং, মৈ-ঈশীংগী ফীভম ফগৎহল্লবা, অনা-লায়েঙগী খুদোংচাবা লেপ্তনা মীয়ামদা ফংহল্লবা লৈঙাক অদূ মীয়ামগী মীচৈ, পেন্দবগী ৱাকৎ কা হেন্না তাবা ফংলোই হায়নসু অখঙ-অহৈশিংনা ফোঙদোক্নরক্লি।
মতম কক্তনা চত্থগদৌরিবা জেনরেল ষ্ট্রাইক অসীদা এগজাম থারিবা মহৈরোশিং, মীয়ামগী তঙায়ফদবা সার্বিসতা থবক তৌরিবা দিপার্টমেন্ট অমদি অতৈ এজেন্সি শিংদি অদুম্মক কোমথোক্কনি হায়না জে এ সী অসীগী মায়কৈদগী ফোঙদোকপসু লৈরি।নেস্নেল হায়ৱে পাকথোকপা অমদি ফীভম ফগৎহন্ননবনি হায়দুনা কুমশিং ২০২১ দগী হৌনা লম্বী অসীদা ফুমদুনা ঈশীং পুরম্বা পাইপশিং অথোরিটিশিংনা ফূক্তুনা পুখ্রবা মতূঙদা ঙসী, লম্বী শেম্বা লোইখিবা মতম য়াম্না কুইখ্রবসু হৌজিকফাওবা পাইপশিং অদূ অমূক হন্না পুরকপা নত্রগা অনৌবা শিন্দোকপিবসু লৈত্রি হায়না পেন্দবা ফোঙদোরক্লি।
ক্লব মাপননা কোল্লিবা এরিয়াশিং অসী জল জিবন মিসনগী খুদোংচাবা অমত্তা ঙসীফাওবা ফংদ্রি।লৈঙাক্না হীরম অসীদা মীৎয়েং চঙবীরকপদু মীয়াম্না খৌরাংনা ঙাইনরি।
