ম্যান্মার দা লৈরিবা খূৎলায় পায়বা ইথনিক গ্ৰূপশিংদা দ্রোন য়াওনা মখল কয়াগী মশীঙ য়াম্লবা খূৎশু-খূৎলায়শিং পীশীন্দুনা টেররগী থবকশিং চত্থবদা চাউনা মতেং পাংশিন্ননবা হোৎনরম্বনি হায়বা য়ুক্রেনিয়ান তরূক অমসুং অমেরিকা মচা অমা নেস্নেল ইনভেষ্টিগেসন এজেন্সি (এন আই এ) না ইন্দিয়াগী তোঙান তোঙানবা মফমশিংদগী ফাগৎপা ঙমখ্রে।
ইনভেষ্টিগেসন এজেন্সি অসীনা মতম অমত্তদা তোঙান তোঙানবা মফমশিংদা চত্থখিবা ওপরেসন্দা মীওই তরেত্তু ফাগৎখিবনি হায়রি। য়ুক্রেনিয়ান তরূক অদূ দিল্লি এয়রপোর্ট অমদি লক্ষনৌ এয়রপোর্টতগী ফাগৎখিবনি অদূগা য়ূ এস মচাদুনা কোলকত্তা এয়রপোর্টতগী ফাগৎপা ঙমখিবনি হায়রি।মখোয়শিং অদূ মিজোরামদা চঙলবা মতূঙদা ম্যান্মার দা চৎখিনবা থৌরাং তৌরম্বনি হায়বা খঙবা ঙমখ্রে।
মখাতানা ৱাহং-পাউহং চত্থবদা মখোয় মমাঙদসু ম্যান্মার দা চত্তুনা মফম অদূগী খূৎলায় পায়বা ইথনিক গ্ৰূপশিংদা মতেঙ পাংখিবগা লোয়ননা য়ূরোপ্তগী দ্রোন কয়ামরূম পুরক্লগা ইথনিক গ্ৰূপশিং অদূদা পীননবা ৱারী শানখি হায়বসু খঙবা ঙমখ্রে। হৌজিক মখোয় তরেৎ অদূ পাতিয়ালা হাওসতা লৈবা এন আই এগী স্পেসিয়েল কোর্টতা পুথোক্লবা মতূঙদা নুমিৎ তরেৎনিগী রিমান্দ লৌথরগা মখাতাবা ৱাহং-পাউহং চত্থরি হায়রি।
