থা অসীগি মঙাদা বি জে পিনা লুচিংবা এন দি এ লৈঙাক্কি অহুমশুবা টার্মগী অনৌবা লৈঙাক অমা শেম্ননবা নরেন্দ্র মোদিনা চ্যের লৌদুনা মহাক মশামক্কি য়ূমদা এন দি এ দা য়াওরিবা পার্টি লুচিংবশিংগী মীফম অমা পাঙথোকখ্রে। মদুদা হন্দক্কি এন দি এগী লৈঙাক অসী শেম্বদা খ্বাইদগী মরুওইবা রোল লৌগদৌরিবা, মখোয় হেক য়াওদবদা এন দি এগী লৈঙাক শেম্নবগী মেজিক নম্বর য়ৌবা ঙমদবনা মরুওইবা কিংমেকর অমা ওইরিবা টেলিগু দেসাম পার্টি (টি দি পি) অমসুং জনটা দল (য়ুনাইটেদ) হায়বদি জে দি (য়ু) দল অনী অসীগী লুচিংবশিংসু শরুক য়াখি।
মীফম অদু লোইরবা মতূংদা পাউমীশিংগা উনবদা টি দি পি লুচিংবা এন চন্দ্রবাবু নাইদুনা, মহাক্কি পার্টি অদু নেস্নেল দেমোক্রেটিক পার্টি (এন দি এ) গী লেঙদ্রবা পার্টনর অমা ওইনা লৈগনি হায়না ফোঙদোকখ্রে।অদূম ওইনমক হন্দক্কি সেন্টর লৈঙাক অসী শেম্বা মতমদা হোম, দিফেন্স স্পিকরগী পোর্টফোলিও য়াওনা য়ামদ্রবদা কেবিনেৎ মিনিষ্টর মঙা পীননবা অকনবা দিমান্দ তৌরি হায়না ফোঙদোকখি।
চন্দ্রবাবু নাইদু অসী হন্দক লোক সভাগী ১৮ শুবা মীখল অদুগা মতম অমত্তদা পূন্না পাঙথোকখিবা অন্ধরা প্রদেশ এসেমব্লি মীখলদা সিট ১৬৪ ফংদুনা য়াম্না চাউনা মায় পাকখিবদগী থা অসীগী মাপন্দা চিফ মিনিষ্টর ওইনা ৱাশক লৌননবা থৌরাং তৌরম্বনি অদুবু এন দি এ গী অহুমশুবা লৈঙাক্কি ৱাশক লৌবগী থৌরম হয়েং জূন নিপান্দা পাঙথোক্ক দৌরিবদুদা শরুক য়াগদবনা মহাক্কি ৱাশক লৌবগী থৌরম অদুনা লাক্লিবা জূন ১২দা ওইনা পাঙথোক্ক নি হায়খি।
