মনিপুরদা ঙাগী পোত্থোক হৌজিক লৈরিবা ফীভম অমসুং চাং অসীদগী মশীং য়াম্না হেঙ্গৎহন্দুনা ঙাগী পোত্থোক্তা মীপাল তাংদনবা পান্দমদা ষ্টেট লৈঙাক্কি মায়কৈদগী হৌখিবা চহী খরগী মতমসিদা অকনবা থৌরাং-থৌশিল কয়ামরুম পায়খৎলক্লি। খোঙথাং অসীগী মনূংচন্না লৈঙাক্কি ফিসরিজ দিপার্টমেন্ট অমসুং ওল মনিপুর য়ুনাইটেদ ক্লবস ওরগনাইজেসন ( অমুকো) না খূৎশম্নরগা তম্পাক্কি দিষ্ট্রিক্ট অহূমদা লৈবা খঙ্গৎলবা, মরূওইবা লৈকায়গী পূখ্রীশিংদা পূন্না ঙা মচা লীশীং নিফুমঙা থাদখ্রে।
মনিপুরদা ঙাগী পোত্থোক য়াম্না ৱাৎপা মরম্না মপান লৈবাকশিং অমসুং ইন্দিয়াগী অতোপ্পা ষ্টেটশিংদগী ঙাগী পোত্থোক পুশিল্লকপদা ষ্টেট অসীদগী য়াম্ল বা শেনফম মীরমদা চহী খূদিংগী থাদোক্লিবনি। ঙাগী পোত্থোক্তা মীপাল তাংদনবা পান্দমদা অমসুং ঙা মরাং কায়না পুথোক্তুনা লমদমশিগী শেন্মিৎলোনগী ফীভম হেন্না ফগৎহন্ননবা থৌরাং অমা ওইনা ইম্ফাল ইষ্ট, ইম্ফাল ৱেষ্ট অমসুং বিষ্ণুপুর দিষ্ট্রিক্ট কি মফমশিংদা লৈরিবা পব্লিক পোণ্ড শিংদা ঙা মচা লীশীং নিফুমঙা থাধখিবনি।
ইম্ফাল ইষ্ট কি পব্লিক পোণ্ড নিপান, ইম্ফাল ৱেষ্ট দিষ্ট্রিক্ট কি পব্লিক পোণ্ড তরুক অমসুং বিষ্ণুপুর দিষ্ট্রিক্ট কি পব্লিক পোণ্ড তরুক তা পূন্না ঙা মচা লীশীং নিফুমঙা থাধখিবনি। থৌরমদুদা ফিসরিজ দিপার্টমেন্টকি ষ্টাফশিং অমসুং অমুকোগী মরূওইবা থৌমী কয়ামরূম শরুক য়াখি।
