তামিল নাদুদা হূ চেনবা য়ু থক্লুবদা শিখিবা মীগী মশীং ৫৪ দা হেঙ্গৎখ্রে

তামিল নাদুগী কলাকুরিচি দিষ্ট্রিক্ট তা হু চেনবা য়ু থক্লুবনি হায়বা থৌদোক্তা মীওই কয়ামরুম শিখিবগী অৱাবা থৌদোক অদুদা মখা তানা মী শিবগী মশীং হেঙ্গৎলকতুনা অশীবগী মশীং ৫৪ য়ৌখ্রে। থৌদোক অদুদগী মীওই কয়াসু তোঙান তোঙানবা হোস্পিটালশিংদা লায়কন্নরগা লৈরিবা মরম্না অশীবগী মশীং মখা তানা হেঙ্গৎলকপা য়ারি হায়না পানরি।
চৎলিবা থা অসীগী ১৯ দা কলাকুরিচি দিষ্ট্রিক্ট তা মিথানোল য়ান্সিল্লবা, হূ চেনবা য়ু থক্লুবদগী মীওই ৪৭ শিখি হায়না ষ্টেট অদুগী চিফ মিনিষ্টর এম কে ষ্টেলিন্না ষ্টেট এসেমব্লিদা ফোঙদোকখিবনি। ইস্যু অদু ষ্টেট এসেমব্লিদা অকনবা মওংদা পুখৎনরকখিবগা লোয়ননা মদ্রাজ হায় কোর্টনসু ষ্টেট লৈঙাক্কি মথক্তা অকনবা ওর্দর ইস্যু তৌরকখ্রবনি।
ট্রেজিদি অদূগী মতাংদা ওপ্পোজিসন ওল ইন্দিয়া অন্না দ্রাবিদা মুন্নেট্রা কাজঘম ( এ আই এ দি এম কে) না এসেমব্লিদা অচৌবা ঈরাং শাগত্তুনা সিট- ইন প্রোটেষ্ট চত্থরকপদগী স্পিকরনা মখোয়শিং অদু হাওসতগী তান্থোকখিবা থৌওং অমসু লৈখ্রবনি।
ইস্যু অদু মীওইবগী পুন্সি হিংবা-শিবগী ৱাফম ওইবা মরম্না লৈঙাক্না লায়না লৌবা য়ারোই। হৌখিবা চহীদগী গভর্নরনা করী করম্বা খোঙথাঙশিং মীয়ামগী পুন্সি কন্ননবা পায়খৎলবগে হায়না ওপ্পোজিসনগী মায়কৈদগী ফোঙদোকখি।