মেকোলা গুলাপ হায়র সেকেন্দরি স্কুলদা হাংবা রিলিফ কেম্পতা, চৎলিবা জানুয়ারি থা অসীগী তরেত্তা মশাগী ইন্নফি অনী শমজিন্নদুনা মশামক্কি ফমুং কাদা থৌরী য়ান্দুনা শীজখিবি সুখাম ওঙবী চনূ দেবি অসি মহাক্কি মপুরোইবা সুখাম জেমস, মকূবোক এস চাউথোই অমসুং মতৈ এস নিংথেমনা অৱুনপোৎ পুরক্তে হায়বগী মলোমদা মতম শাংনা মোরেল হারাসমেন্ট পীবদগী খাঙঙমদ্রদুনা মথন্তা শিজখিবনি হায়না লৈখিদ্রবি চনূগী মবূঙনি হায়বা অমনা পুলিসতা কমপ্লেন্ট অমা ফাইল তৌরকখ্রে। কমপ্লেন্ট অদূগী মতূং ইন্না নম্বোল পুলিশ ষ্টেসন্না বি এন এস কি সেক্সন ৮০ অমসুং ৩(৫) গী মখাদা কেস অমা লৌখত্তুনা থিগৎপা হৌখ্রে হায়রি।
চনূগী মবূংনি হায়রিবা মীওই অদুগী মমিংনা সিনাম কংলৈঙানবা, অপোকপা লৈখিদ্রবা এস মনি কৌই, চীঙমৈরোং লৈ ইংখোলদগীনি হায়রি। মমাঙ চহী ২০২৪ গী সেপ্তেম্বর থাদা সুখাম জেমসতা অনীরক হন্না চেন্দুনা য়ূম্বান লম্বীদা খোঙদারকপদগী মপূরোইবগা তোয়না লোয়নদুনা লৈমিন্নবসু ফংখিদে হায়রি। মহাক্কি মপুরোইবা জেমস হায়রিবা মীওই অসী করিগুম্বা ফিভম খরদগী মেকোলা গুলাপ হায়র সেকেন্দরি স্কুলদা হাংবা রিলিফ কেম্পতা রেজিষ্টর তৌদুনা লৈবা য়াদবদগী মখোয় অনী তোঙান তোঙান্না লৈনরকখিবনি।
চনূগা রিলিফ কেম্পতা লৈমিন্নবনা মকূবোক এস চাউথোই অমসুং মতৈ এস নিংথেম হায়রিবশিং অসিনি। চনূগী ঈমূং- মনুংনা লৌখৎপিদবা অমসুং অৱুনপোৎ পীরক্তবগী মলোমদগী মঙোন্দা মখল কয়াগী পাম্বৈ শীজিন্নদুনা ওৎপা নৈবা হেনমনবদগী খাঙবা ঙমদদুনা মথন্তা শিজখিবনি হায়না রিপোর্ট অদুদা পল্লি হায়রি। কেস অসীগা মরী লৈননা পুলিসনা জেমস য়াওনা ঈমূং- মনূঙগী মীওই খরা ফাগৎপা হৌখ্রে অদুগা চনূগী থৱায় য়াওদ্রবা হকচাংসু অরোয়বা মথৌ-মঙম পাঙথোকখ্রে হায়রি।
