মনিপুরগী গভর্নর ওইনা থৌ পুদুনা লাকখিবি আনুসুইয়া উইকেগী মফমদা নুংশিনা বিদাই পীবগী থৌরম অমা ঙরাং মনিপুর লৈঙাক্কি মায়কৈদগী ইম্ফালগী রাজ ভবন কমপ্লেক্স তা পাঙথোকখ্রে। বিদাই পীখিবা থৌরমদুদা ষ্টেট লৈঙাক অসীগী স্পিসিয়েল চিফ সেক্রেটরি এম ঐচ খান, এদ্দিস্নেল দিরেক্তর জেনরেল ওফ পুলিশ ( ইন্টিলিজেন্স) আসুটোস সিনহা, সিভিল অমসুং পুলিসকি মকোক থোংবা ওফিসার কয়ামরুম শরুক য়াখি।
সেক্রেটরি টু গভর্নর ওইনা লৈরিবা বোবি ৱাইখোম্না হান্নগী গভর্নর অসিনা হৌজিক মনিপুরদা থোক্লিবা হীংশাগী ঈরাং অসীগী ৱারোয়শিন অমা পুরক্ননবা, শান্টি হঞ্জিলহন্ননবা, ইন্টর্নেল্লি দিসপ্লেস পার্সনশিং মশা-মশাগী হান্নগী খুঙ্গংশিংদা অশোয়- অঙাম অমত্তা য়াওদনা পূক্নিং নুঙাইনা হঞ্জিলহন্ননবা অহীং-নুংথিল খাক্তনা হোৎনরম্বা কয়া অদুবু মচা খায়না ফোঙদোক্তুনা থৌরমদুদা তিনখিবা মীয়ামদা পাউদমখি। রাজ ভবন অমসুং মসিদা থবক তৌরিবা এমপ্লোয়িশিংগী ফীভম ফগৎহন্ননবা হান্নগী গভর্নর অসীনা য়াম্না পুকচেল শেংনা পায়খৎলম্বা থবকশিংগী মতাংদসু মহাক্না ফোঙদোকখি।
মহাকপু বিদায় পীবা থৌরম অদুদা ৱাফম খরা ফোঙদোক্লদুনা মনিপুরদা শান্টি হনজিলহন্ননবা হোৎনবদা চিফ মিনিষ্টর নোংথোম্বম বিরেন, মিনিষ্টরশিং, এম এল এ শিং, চিফ সেক্রেটরি, পুলিস অমসুং সিভিলগী মকোক থোংবা ওফিসারশিংনা লৌখিবা থৌদাংশিংবু উইকেনা থাগৎপা ফোঙদোক্লমখি। মহাক্না মনিপুরদগী হনখ্রবসু হীংসা অসীগী অৱাবা নংলবা মীয়ামগী নুঙাইবা পুন্সি মরেল হঞ্জিল্লকনবা মখা তানা থবক পায়খৎলক্কনি হায়নসু মমীত্তগী পি শিন্থরদুনা হান্নগী গভর্নর অসিনা ফোঙদোক্লমখি।
