মনিপুরদা সাসন তৌরিবা ভার্টিয়া জনটা পার্টি (বি জে পি) গী লৈঙাক অসিনা লমদম অসীদা লৈরিবা কাঙলূপ-ফূরূপশিংগী মরক্তা য়ুনিটি অমসুং ইন্টিগরিটি শাগৎনবা হোৎনবগী মহূত্তা অমগা অমগা নুংশিনদনবা অমসুং দিষ্ট্রিক্টশিংগী মরক্তা খাইবুং- খাইবুং তানদুনা মচেৎ তানহন্নবা ঙাইহাক লৈতনা পোরম য়াত্তুনা লৈরিবসি অকিবগী মশক্নি। মখল কয়াগী থৌওং চত্থরকপগা লোয়ননা এ দি সি অমসুং পঞ্চায়েটি রাজ ইন্সটিট্যুসনশিং নমথনবা, মখোয়গী খূৎচাবী মীওইশিংগী খূত্থাঙদা অসীগুম্বা ইন্সটিটিউট কয়া চল্লাইহন্দুনা সেন্টরনা থাধরকপা ফন্দ শায়েন- ঙায়েন্ননবা হোৎনরক্লিবসি খ্বাইদগী মিপাইনিঙায় মশক ওইরক্লি।
দেমোক্রেটিক প্রিন্সিপলশিং থুগাইবা হৌরক্লি অদুগা ইন্দিয়ান কন্সটিট্যুসনবুসু ওন্থোক ওন্সিন তৌরক্তূনা লৈবাক অসী মথক-মখা ওন্থোক্কদৌরি। মসী মীয়াম্না চেকশীনবগী তঙায়ফদবা লৈরি হায়না কম্যুনিস্ট পার্টি ওফ ইন্দিয়া (মার্ক সিষ্ট) মনিপুর ষ্টেট কাউন্সিলগী সেক্রেটরি খেত্রিময়ুম সান্ত না অকনবা ৱাফম ফোঙদোকখ্রে। সি পি আই ( এম) ইম্ফাল সিটিগী ২০ শুবা কনফরেন্স ঙরাং ইম্ফালগী শগোলবন্দ সলাম লৈকায়দা লৈরিবা পার্টি অসীগী ওফিসতা পাঙথোকখিবগা লোয়ননা কনফরেন্স অদুদা ৱা ঙাংবদা মহাক্না ৱাফম অসী ফোঙদোকখিবনি।
মনিপুর লৈঙাক্না চত্থরক্লিবা মথোঙ হূক্তবা থবক-থৌওংশিং অসী সি পি আই (এম) না মীয়ামগী মতেংগা লোয়ননা অকনবা মওংদা থিংননবা হোৎনগনি হায়খি। কনফরেন্স অদুদা ইম্ফাল সিটি অমসুং অকোয়বা মফমশিংগী লম্বী থোংগী ফিভম ফগৎহন্ননবা থবক পায়খৎলূ, স্কুলশিংগী ইনফ্রাষ্ট্রকচর শেমগৎলু, নফসাগী চেং মীয়ামদা মরাং কায়না ফংহল্লু, আই এম সিগী ইলেক্সন অথূবদা পাঙথোকউ হায়না তকশীন্ননবা রিজোল্যুসনশিং অমত্তা ওইনা পাস তৌখি।
