হৌখিবা চহী কুন্থরা হেন্না কংগ্রেস পার্টিগী য়াম্না মরূওইবা কর্মি অমা ওইদুনা লাকখিবা লোয়ননা মিনিষ্টর ফম ফাওবা পায়রম্লবা ইরেংবম হেমোচন্দ্রা কংগ্রেস পার্টিদগী বিদাই লৌখ্রে। শীংজমৈ কেন্দ্রদগী কংগ্রেসকি টিকেট্টা টার্ম মঙারক হন্না মীখলদা মায় পাক্তুনা মতম শাংনা মহাক্কী কেন্দ্রগী অমসুং মনিপুরগী মীয়ামগী থৌগল তৌদুনা লাকখিবা শক্নাইরবা কংগ্রেস লুচিংবা অসী অরোইবা ওইনা পার্টি অসীদগী থোরকখিবনি হায়রি।
মহাক তোঙান তোঙানবা পোর্টফোলিওশিং পুদুনা মিনিষ্টর অমা ওইরম্বতা নত্তনা ষ্টেট লেজিসলেটিব এসেমব্লিগীসু স্পিকর ওইনা মীয়াম অমসুং লৈঙাক্কি থৌ পুদুনা লাকখিবা মীশক অমনি। মমাঙ থা মার্চ কি ৩১ দা মহাক্না ইন্দিয়ান নেসনেল কংগ্রেসকি প্রাইমারি মেম্বরশিপ্তগী তোকপগা লোয়ননা মহাক্না পার্টিগী ওইনা পায়রম্বা পোষ্ট খূদীংমক্তগী পোত্থাজরগে হায়না পার্টিগী ষ্টেট প্রসসিদেন্টগী মফমদা রেজিগনেসন লেট্টর পীশিনখি ।
মহাক্কী রেজিগনেসন লেট্টর অদুদা মরুওইনা পল্লিবদি কংগ্রেস পার্টিগী থবক থৌওংশিং, নিতি নিয়মশিং অসিদা মহাক মখা তানা করিগুম্বা মখলগী থাজবা অমত্তা লৈত্রে হায়বা ৱারোলশিং ফোঙদোকখি হায়রি। পনবা য়াবদি, হন্দক পাঙথোক্নবা থৌরাং তৌরিবা ১৮ শুবা লোক সভাগী মীখল অসিদা ইন্নর মনিপুর পারলিয়ামেন্টরি কন্সটিট্যুয়েন্সিদা কংগ্রেসকি মীরেপ অমা ওইনা জে এন য়ুগী প্রোফেসর দাঃ অঙোমচা বিমোল অকোয়জমবু থাদোরকখিবা চৈরক্তা ইরেংবম হেমোচন্দ্রনা মশামক পার্টি অসিদগী ফম থাদোকপগী মতাংসি তেন্দর তৌরকখিবনি। হৌখিবা মার্চ থাগী ৩১ গী নুংথিলদা মনিপুর প্রেস ক্লবতা পাঙথোকপা পাউমীশিংগা উনবা থৌরম অমদা মহাক্না থম্মোয় শেংনা পার্টি অসিদগী তোক্নবগী ফীরেপ লৌরকপনি হায়না ফোঙদোকখি।
