হৌখিবা চহী নিফূরোম মীয়ামগী সপ্পোর্ত অমসুং থাজবগা লোয়ননা মখল-মখা কয়াগী অনাবশিং লায়েঙদুনা লাক্লিবা শীজ হোস্পিটাল্স এন্দ রিছার্স ইন্সটিট্যুট না মেদিকেল ইথিক্স চেৎনা থাগোন্নজরগা মীয়াম অমসুং অনাবশিংগী থৌগল তৌদুনা লাক্লি, মেদিকেল ইথিক্স ঙাক্তনা থবক তৌখিবা অমত্তা লৈতে অদূগা শিরবা অনাবশিংগী হকচাঙদা ওক্সিজেন থাজীন্দুনা ইন্টেন্সিব ক্যের য়ুনিট (আই সি য়ূ) তা থমজিল্লগা হোস্পিটাল অসীনা শেল তাল্লি হায়বনচিংবা ৱাফমশিং কে সি পি (পি দব্লিয়ু জি) এমসি য়ুনিফিকেসন্না ফোঙদোরকপগা লোয়ননা হোস্পিটাল অসীদা অথীংবা থম্লক্লিবসি য়াম্না লাইবক থীবনি হায়না প্রাইভেৎ হোস্পিটাল অসীগী মেনেজিং দিরেক্টর দা.কে ঐচ পালিন্না ফোঙদোকখ্রে।
পাউমীশিংদা ৱা ঙাঙবদা মহাক্না ঙরাং ৱাফম অসী ফোঙদোকখিবনি। দা.পালিন্না হায়, লৈঙাক্কি হোস্পিটালশিংদা থবক তৌবা দাক্টরনা প্রাইভেৎ ক্লিনিক্তা প্রক্তিস তৌবা য়ারোই হায়বা কাঙলোন অদূসু শীজা হোস্পিটালনা চেকশীন্না ঙাক্না চৎলি।মেদিকেল ইথিক্সকি মতূঙ ইন্না ব্রেন দেথ ওইরবা অনাবা অমা শিরে হায়না লাউথোকপা য়াদে।লৈবাক অসীদা লায়েঙবা ঙম্লরোইদবা অনাবশিং মথন্তা শিজনবগী অয়াবা পীবসু লৈতে।
য়ূথনেসিয়া হায়না খঙনরিবা থৌওং মখল অসী আইননা য়াদবা মরম্না ব্রেন দেথ ওইরবা পেসেন্টশিংসু ঈমূঙ-মনূঙগী অপাম্বগী মতূঙ ইন্না মশা-মশাগী ময়ূমদা পুথখিবা নত্রগা হকচাংগী তোঙান তোঙানবা কয়াৎশিং দোনেট তৌবগী খুদোংচাবা ফংহল্লি। কনাগুম্বা খরদি লায়েঙবা ঙম্লরোই খঙলবা মতূঙদা ময়ূমদা পুথখিবা য়াওই অদুগা খরা অমদি লাইবক অদুম্মক য়েংজখিগে হায়বসু য়াওই হায়খি।
