মনিপুরদা লমদম অসীগী য়েলহৌ-ঙা মখল অমা ওইরম্বদগী কাঙখূৎ মূৎশীল্লক্লবা, ফ্রেস ৱাটর সার্ক হায়রগসু খঙনরিবা শরেং মচা কোকহন্দুনা ঙা মখল অসী পাক-সন্না পুথোরক্লিবা ঙামী সলাম রোহেন্দ্রোবু শীঙথানিঙায় ওইরবা, লেমজনিঙাই ওইরবা লাল বহাদুর শাস্ত্রি নেস্নেল একাদেমি ওফ এদমিনষ্ট্রেসন ( এল বি এস এন এ এ) না মসীগী ৯৯শুবা ফাওন্দেসন কোর্স তা শরুক য়াদুনা, নৌনা সিভিল সার্বিস এগজামিনেসনশিংদা মায় পাক্লক্লবা প্রোবেস্নরশিংগা ইন্টরেক্ট তৌননবা অহুম্লক শুবা ওইনা বার্তোন তৌরকখ্রে।
জাতিগী থাক্তা পাঙথোকপা অৱাংবা থাক্কি এগজামশিংদা মায় পাক্লক্তুনা হায়-ক্লাসকি ব্যুরোক্রেট ওফিসার অমমম ওইরগদবা সিভিল সার্বিসকি প্রোবেস্নরশিংগা ইন্টরেক্ট তৌননবা অসুম্না নেস্নেল একাদেমি অসীনা বার্তোন তৌবিরকপা হায়বসি মহাক্কিখক্তা নত্তনা মনিপুর মচা অমা ওইনা চাউথোকচবা থম্মোয়দা ফাওই হায়না ইন্দিয়া টুদে নোরথ ইষ্ট কা অখন্ননা উনদুনা ৱারী শান্নখিবা অমদা রোহেন্দ্রোনা ফোঙদোকখি।
একাদেমি অসীনা মমাঙদসু অহানবা অমসুং অনীরকশুবা ওইনা বার্তোন তৌরক্তুনা মহাক শরুক য়ারুরে অদুবু হন্দক্কি অসীগুম্না সিভিল সার্ভিস প্রোবেস্নরশিংগা ইন্টরেক্ট তৌনবগী খুদোংচাবদি ফংখিদ্রি হায়না রোহেন্দ্রোনা ফোঙদোকখি। মহাক্কি ঙাগী ফার্ম অদু য়াম্না অপীকপা স্কেলদগী হৌরকখিবনি অদুবু মহাক্না লেপ্তনা হোৎনজবগী মহয়না ঙসিদি হেক্তর মঙাদা মখল কয়াগী ঙাশিং য়োকপা ঙম্লে হায়খি।
