হন্দক পাঙথোক্নবা থৌরাং তৌরিবা ১৮ শুবা লোক সভাগী মীখল অসিদা ইন্নর অমসুং আউটর মনিপুর পারলিয়ামেন্টরি কন্সটিট্যুয়েন্সি অনিমক্তা ইন্দিয়ান নেসনেল কংগ্রেসকি মীরেপ ওইরিবশিংদা ঙাইহাক লৈতনা টারগেৎ তৌদুনা অকি-অখঙ কয়ামরূম নংহনবগী থৌওংশিংগী মশীং অসুম অসুম হেঙ্গৎলক্লি। মসিগী শরূক অমা ওইনা আই এন সিগী টিকেট্টা ইন্নর মনিপুর পারলিয়ামেন্টরি কন্সটিট্যুয়েন্সি দা মীরেপ ওইরিবা দাঃ অঙোমচা বিমোল অকোয়জমগী য়ূমদা হৌখিবা মার্চ থাগী নুংথিলগী পুং ৩ তাবদা শকখঙদবা মীওই ৫/৬ লাক্লগা ইমুং মনূংগী মীওইশিংদা মহাকপু হংলম্বগা লোয়ননা মার্চ ২৯ গী অয়ুক পুং ৮ তাবদা ইম্ফাল ইষ্ট দিষ্ট্রিককি মনূং চন্না লৈরিবা কোম্বিরৈ গার্দেন্দা লাক্ননবা খঙহল্লমখি হায়রি।
মমাঙদসু আউটরদা আই এন সিগী টিকেট্টা মীরেপ ওইরিবা আলফ্রেদ কানঙম অরথরগী মীখলগী মীটিংশিংদসু শকখঙদবশিংনা বোম, নোংমৈ কয়ামরূম কাপশিন্দুনা অকি-অখঙ নংহল্লম্বগী থৌদোকশিং লৈখ্রবনি।থৌদোক অসীগা মরী লৈননা কংগ্রেস পার্টিগী মায়কৈদগী মনিপুরগী চীফ ইলক্তোরেল ওফিসার ওইনা লৈরিবা প্রদিপ কুমার ঝাদা অইবা ৱাকৎ চেরোল পীশীনখিবগা লোয়ননা বিমোল অকোয়জমগীদমক সেক্যুরিটি পীবিয়ু হায়না তকশীনখ্রে।
থৌদোক অদুগা মরী লৈননা মীরেপ ওইরিবা বিমোল মশামক্না এম পি সি সিগী লিগেল দিপার্টমেন্ট কা লোয়ননা সেক্যুরিটি পীবিয়ু হায়না মনিপুরগী দি জি পিদা অইবা চেরোল পীশীনখ্রে হায়রি। ঙসীফাওবা বিমোলগী সেক্যুরিটি পীরক্তবনা মরম ওইরগা পামদবা থৌদোকশিং থোক্লক্কদ্রা হায়বগী চিংনবসু চাউনা লৈরে হায়না এম পি সি সি গী প্রসসিদেন্ট কৈসাম মেঘচন্দ্রনা ফোঙদোকখি।
