শখকখঙদবশিংনা ফাখিবা মীওই অনিগী মনুংদা অমা শিরে, অমনা অরুবা ফীভমদা শোকপদগী লায়কন্নখ্রে, চিংনবা মীওই ১১ ফাগৎলে

ইম্ফাল মে ১৮: থৌবাল দিষ্ট্রিক্টকি মনুংদা লৈবা কৈবুং মথক লৈকায়দগী নূপামচা অনী দ্রগ য়োল্লি হায়বগীদমক শকখঙদবা মীওই খরনা লিলোংগী মফম অমদগী ফাদুনা পুখ্রবা মতূংদা য়াম্না তমথীনা ওৎ-নৈদুনা ফূবদগী নূপামচা অমা লায়কন্নবা ঙমদনা লৈখিদ্রে অদুগা অতোপ্পা নূপামচা অমনা য়াম্না অরুবা ফীভমদা শোকপদগী হৌজিক হোস্পিতালদা পুখত্তুনা লায়কন্ন দুনা লৈরি।
লৈখিদ্রবা নূপামচা অদু কৈবুং মথক লৈকায়দগী এম দি জহীর খান এলাইজ অতোম্বা (২৩) অপোকপা এম দি নসিম্মুদ্দিন কৌই অদুগা অরুবা ফীভমদা শোকপদগী লায়কন্নদুনা লৈরিবা অদুনা লৈকায় অসিমক্তদগী এম দি ফরিদ এলাইজ বোইচা (২০) অপোকপা এম দি হফিজুদ্দিন কৌই হায়রি।
পুলিসতগী ফংবা পাউ মতূং ইন্না, শখকখঙদবশিংনা হোস্পিতালদা পুখৎলকপদা জহীর খান শিরবা মতূংদা পুরকপনি হায়না দাক্তরশিংনা ফোঙদোকখি অদুগা ফরিদ এলাইজ বোইচাদি কা হেন্না অরুবা ফীভমদা শোকপদগী রিফর তৌখ্রে হায়রি। লৈখিদ্রবা নূপামচা জহীর খানগী হকচাং অদু জেনিমসকি মীরেলশঙদা থমখ্রে।
মসিগী মতাংদা কৈবুং কম্যুনিটি হোলদা মীয়ামগী ওইবা মীফম অমা এম দি হকিম্মুদ্দিননা চ্যের লৌদুনা পাঙথোকখিবগা লোয়ননা জে এ সি এগেন্স দি ব্রুটেল কিল্লিং ওফ এম দি জাহির খান এলাইজ অতোম্বা ওফ কৈবুং হায়না মিংথোনবা জে এ সি অমা শেম্বগা লোয়ননা ৱারেপ কয়ামরুমশু লৌখ্রে। জে এ সি অসিগী কনভেন্নর এম দি সহিদ খান না পাউমীশিংগা উনবদা ফোঙদোরকপা মতূং ইন্না, লিলোং অৱাং লৈকায়দগী বোগিময়ূম অবেম্মা, অপোকপা এম দি ফকর হায়বসিনা জহীর খানবু মহাক্কা চেন-চোংদুনা লৈরম্লবা সোরাদগী রেজিয়াগি মরমদা ৱারী শান্ননবা কৌরকপদগী মমান্নবা এম দি ফরিদ এলাইজ বোইচাগা লোয়ননা অবেম্মাগী য়ূমদা চৎখিবনি। লিলোং অৱাং লৈকায় য়ৌরবা মতূংদা হান্নদগী প্লান তৌরবা মওংদা মশক খঙদবা মীওই খরনা ফোর হ্বিল্লর গারি অমদা কিদনেপ তৌখি। মদুগি মতূংদা জহীর খান শিনা ফংখিবনি হায়খি।থৌদোক অসিদা চেন্নবনি হায়বা মীওই ১১ হৌজিক ফাওবদা ফাগৎপা ঙমখ্রে। মখা তানা ফাগৎকদবা মীওই খরা লৈবা মরম্না পুলিস অথোরিটিনা মখোয়বু ফাননবা অকনবা থবক পায়খৎলি হায়রি।