সেপরেট এদমিনিষ্ট্রেসন তাল্লিবা কুকি এম এল এ ১০ চৈরাক পীয়ূ হায়দুনা ঈমাগী মৈরানা এসেমব্লিদা থোমজিনখ্রে

মনিপুরগী অপুনবা শক্তম থুগাইনবা হোৎনদুনা সেপরেট এদমিনিষ্ট্রেসনগী দিমান্দ তৌদুনা সেন্টর দা অকনবা প্রেসর পীরিবা কুকি জোগী এম এল এ শিংগী মথক্তা অকনবা এক্সন লৌখৎনবা মনিপুর লেজিসলেটিভ এসেমব্লিগী স্পিকরদা পীশীনখিবা চেরোলদু ঙসীফাওবা থবক্তা ওনথোক্তে হায়না অশাওবা ঊৎলদুনা ঈমাগী মৈরা লূপ্না মনিপুর লেজিসলেটিভ এসেমব্লিদা থোমজিন্দুনা অকনবা মওংদা খোঙজঙ চঙশীনখ্রে।
স্পিকরদা পীশীনখিবা চেরোলদু ঙসীফাওবা মীয়ামদা পাউখুম পীদনা লৈরিবগী মরম পীদবা য়ারোই, ষ্পিকর উনগনি, চপ চানা ৱারী শান্নরগা অশেংবা, তঙতাবা অমা খঙনগদবনি হায়দুনা এসেমব্লি গেট মমাঙদা ঈমাগী মৈরাগী মশিং য়াম্লবা থৌমীশিংনা থোমজিল্লকখিবনি।
মনিপুর লেজিসলেটিভ এসেমব্লিগী স্পিকর টি ঐচ সৈত্যবর্তাদি ঈমাশিং অদুনা উনবা ফংখিদে। ঙরাংগী খোঙজঙ অদুগা মরী লৈননা ঈমাগী মৈরাগী কনভেননর কে ঐচ সুজাটানা হায়, কুকি জোগী এম এল এ তরা না ভোৎ কারবা মতমদা মীয়ামদা ৱাশকখিবা অচেৎপা প্রোমিস কয়াদু থুগাইদুনা মখোয় মশা মশামকনা মনিপুর থুগাইনবা হোৎনদুনা সেপরেট এদমিনিষ্ট্রেসনগী দিমান্দ তৌরক্লদুনা অকনবা ঈহৌ চঙশীল্লবফাওবদা এন বিরেন্না লুচিংবা ষ্টেট লৈঙাক্ অসীনা তুফক-তুফাই চন্দুনা, অশীবগুম তূমিন্না য়েংদুনা লৈরিবসি মনুংদা করম্বা অরোনবা এজেন্দা লৈবগীনো।ঙসীফাওবা কুকি জোগী এম এল এ শিংগী মথক্তা অকনবা এক্সন অমত্তা লৌখৎনবা মনিপুর লৈঙাক্না হোৎনদ্রি।কুকি জোগী এম এল এ তরানা মনিপুর থুগাইনবা হোৎনদুনা সেপরেট এদমিনিষ্ট্রেসনগী দিমান্দ তৌদুনা লিংজেল মান্নবদি ঙম্লগ লেমহৌরিবা এল এ ৫০ না করিগীদমক পূন্সীন্নদুনা মনিপুর কন্নবা এসেমব্লি মীফম কৌদুনা খন্নব ঙমদ্রিবনো হায়খি।