সেন্টরনা কুকি- জো মিলিটেন্ট শিংদা মপূংফানা মতেং পাংশিল্লি হায়বসি ময়েক শেংলে:ও ইবোবি

হৌখিবা থা ১৫ রোম হেল্লক্লবা মনিপুরগী ঈরাং অসিদা চিন-কুকি নার্কো-টেরোরিষ্ট শিংনা ইনৌ নৌবা থৌওং ওইনা দ্রোন ফাওবা শীজিন্নদুনা অকনবা বোমগী এত্তেক চত্থরক্লবফাও ইন্দিয়াগী সেন্টর লৈঙাক্না তূমিন্না, খঙশীন- উশিন্নদনা লৈরিবা অসিনা তাক্লিবসি, কুকি- জো মিলিটেন্ট শিংনা লমদমসিদা মনিপুর থুগাইনবা হোৎনবসিদা সেন্টরনা মপূংফানা মতেং পাংশিল্লি হায়বসি ময়েক শেংলে হায়বনি।

মীয়াম্না তাঞ্জা অসীদা করি করম্বা ফিরেপ লৌগদগে হায়বদু খন্নবগী মতমদু চপ চানা য়ৌরে হায়না কংগ্রেস লুচিংবা ওক্রম ইবোবিনা ফোঙদোকখ্রে। পোলিটিকেল পার্টি তরাগী ইন্দিয়া ব্লোক্না হন্দক কুকি- জো মিলিটেন্ট শিংনা চত্থরকখিবা এত্তেকশিংগী মতাংদা য়ানিংদবা ফোঙদোক্তুনা মনিপুরগী গভর্ণর দা মেমোরেন্দম অমা পীশিল্লুরবা মতূংদা ঙরাং মহাক্না ৱাফম অসি পাউমীশিংগা কংগ্রেস ভাবন্দা উনবদা ফোঙদোরকখিবনি।

ইন্দিয়া ব্লোক্কি মহূৎ শিল্লদুনা সি এল পি লিদর ইবোবিনা মখা তানা হায়, মনিপুরগী গভর্ণর অসী ষ্টেট অসীগী ওইনদি কন্সটিট্যুস্নেল হেদনি। মনিপুরদা হৌজিক চিন- কুকি নার্কো-টেরোরিষ্ট শিংনা চত্থরক্লিবা হীংশা অসী লোইশিন্ননবা হোৎনবদা গভর্ণরগী অচৌবা থৌদাং লৈরিবা মরম্না মেমোরেন্দম অমা পিশীনখিবনি হায়খি।