সেনাপটি দিষ্ট্রিক্ট কি ময়াংখাংদা শারিবা ট্রিপ্পল আই টি অসিনা লমদম অসীগী মহৈরোয়শিংদা মালেম-থাক্কি ইদুকেসন পীবা ঙম্লগনি হায়না চিফ মিনিষ্টর নোংথোম্বম বিরেন্না ফোঙদোকখ্রে। প্রোজেক্ট অসী মনিপুরদা অখন্ননা অমসুং অহানবা ওইনা, অনৌবা আসা অমগা লোয়ননা পায়খৎপনি। মসীনা আই টি গী লমদা চীঙলৈবাক ষ্টেট অসীদা অনৌবা অওনবা অমা পুরকপা ঙম্লগনি, টেক্নোলোজিগী মতাংদা মনিপুরসু মালেমগী মেপতা চনবা ঙম্লগনি হায়না চিফ মিনিষ্টরনা অপেনবা ফোঙদোকখ্রে।
ঐখোয়গী নহারোলশিংদা অনৌবা মঙাল অমা, মালেমগী থাক্তা পীবা ঙম্লগনি। ট্রিপ্পল আই টি অসি লৈবাক অসীদা পায়খৎলক্লিবা অনৌবা অমসুং অফবা মখলগী প্রোজেক্ট শিংগী মনুংদসু অমা ওইরি হায়না চিফ মিনিষ্টরনা ফোঙদোকখি। ইন্সটিটিউট অসীদা লৈফম থোকপা ফেসিলিটি খূদিংমক অমত্তা চিত্থদনা ফংহল্লগনি। মদুসু খ্বাইদগী হেন্না অফবা মখলগী ওইগনি। হীরম অসোমদা য়েংলুরবদি নোরথ ঈষ্ট ইন্দিয়াদা মনিপুরনা অহানবা মফম কন্দুনা লৈরি হায়নসু চিফ মিনিষ্টর অসিনা ফোঙদোকখি।
হৌখীবা নুমীৎ খরনিগী মতমসিদা ন্যু দিল্লিদা লৈদুনা, হৌজিক মনিপুরদা থোক্লিবা হীংশাগী ঈরাং অসী লেপহন্ননবা সেন্টরগী মকোকথোংবা লুচিংবা কয়াগা উনদুনা ৱাফম কয়ামরুম খন্ন-নৈনরুরবা মতূংদা চিফ মিনিষ্টর অসি ঙরাং নুংথিল পূং অনী তাবদা ইম্ফালদা থুংলখিবনি। ষ্টেট লৈঙাক্কি ৱার্ক্স মিনিষ্টর গোবিন্দাস কোন্থৌজমসু চিফ মিনিষ্টর গা লোয়ননা ইম্ফালদা থুংলখিবনি। থা অসীগী ১৮ দা বি জে পি না লৈঙাকপা ষ্টেটশিংদগী লাকপা চিফ মিনিষ্টরশিংগী অপূনবা মীফম অমা প্রাইম মিনিষ্টরনা চ্যের লৌদূনা পাঙথোকখিবা অদূদা চিফ মিনিষ্টর বিরেনসু শরুক য়াখিবনি।
