সেকমাই এরিয়াদা কুকি মিলিটেন্ট শিংনা কাপশীল্লকপদা ভি দি এফ অমা শোক্লে, সনাশাবিগী খুঞ্জাশিংনা সেক্যুরিতি থম্বিনবা তকশীল্লক্লি

ইম্ফাল মে ১৮: ইম্ফাল নোংচুপ পানাগী সেকমাই এরিয়াদা লৈবা নোংথোম্বন্দ অমসুং সেকমাই লাইপাৎ পরাউ এরিয়াদা কুকি মিলিটেন্ট শিংনা অকনবা মওংদা নোংমৈ কাপশীল্লকপদা ভি দি এফ পার্সনল অমা শোক্লে। নোংমৈ কাপশীল্লকখিবা অদুদা মফম অদুদা দ্যুটি তাদুনা লৈবা ষ্টেটগী ফোর্সনসু খূৎ হন্দুনা নোংমৈ কাপ্নখ্রে।
থা অসীগী ১৬ অমসুং ১৭কি লোন্নবা অহীংদা কুকি মিলিটেন্টশিংনা দ্রোন শীজীন্নদুনা অনেম্বা অলটিচুদতা সেকমাই নোংথোম্বন্দ অমসুং পরাউ এরিয়াদা কোইপাই পাইদুনা ফীভমশিং য়েংথোক্লবা মতুংদা লুৱাংশঙ্গোল অমসুং ফাইলেনরোমদগী অকনবা মওংদা নোংমৈ কাপশীল্লকপদা ভি দি এফ পার্সনল অদু মখোঙদা পান্দুনা শোকখিবনি।
হৌখিবা অহীং পূং ১ হেল্লকপা মতম ফাওবদা চত্থরকখিবা এত্তেক অদুদা নোংমৈ মরূনা পান্দুনা মখোঙদা শোকখ্রবা ভি দি এফ পার্সনল অদুগী মমিংদি ময়াংইম্ফাল বেঙ্গুন্দগী ৱাংময়ূম বাদরূদ্দিন (৩২) অপোকপা রফিকনি। মহাক্কী ওই থংবা খুবোমদা নোংমৈ মরূনা পান্দুনা ইম্ফালগী রাজ মেদিসীটি হোস্পিতালদা পুখত্তুনা লায়কন্নখ্রে। মহাক্কী ফীভম হৌজিক খুদোং থীনিঙাই ওইদ্রে হায়রি।
অমরোমদা, ইম্ফাল ইষ্ট দিষ্ট্রিক্টকি মনুংদা লৈবা সনাশাবিগী এরিয়াদা কুকি মিলিটেন্টশিংনা ঙাইহাক লৈতনা চত্থরক্লিবা হীংশাগী অকনবা এটেক কয়া অসিনা মরম ওইদুনা লমদম অসোমগী খুঞ্জাশিং খুদোংচাদবা কয়ামরুম মায়োক্নরগা লৈরি। অহীং তূম্ফম চাফম খঙনদনা কোয়চেন চেন্নরগা লৈরি। মফম অসিদা লৈরম্বা সেক্যুরিতি ফোর্স শিংসু লৌথোকখিবদগী খুঞ্জাশিং মিপাইনবা হেঙ্গৎলক্লে। মরম অদুনা মফম অসিদা মতীকচাবা সেক্যুরিতি ফোর্স থম্বিনবা ঈমাগী মৈরা লূপকি কনভেন্নর টি ঐচ সুজাটানা ফোঙদোরক্লি।