সেক্যুরিটি ফোর্সনা কে এন এফ ( এম সি) গী কাদর অহুম, য়াম্লবা খূৎলায়শিংগা কোন্ননা ফাগৎপা ঙমখ্রে

কাংপোকপি দিষ্ট্রিক্টকি ন্যু কৈথেলমানবি পুলিস ষ্টেসনগী মনূংচন্না লৈবা হেংজোল কুকি ভিল্লেজগী চিফ কি য়ূমদা আইন্না থিংখ্রবা কুকি নেস্নেল ফ্রন্টকি লালহৌবশিং লৈরে হায়বগী অকক্নবা,থাজবা য়াবা পাউ অমা ফংবদগী আসাম রাইফলস অমসুং সি আর পি এফকি তোঙান তোঙানবা য়ুনিটশিংগী কম্বাইন্দ টিম অমনা খূদক্তা মফম অদুদা চঙশীন্দুনা সার্স ওপরেসন চত্থবগা লোয়ননা ভিল্লেজ চিফ অদুগী য়ূমদা কোয়শিন্দুনা থমখ্রে। সেক্যুরিটি ফোর্সনা য়ূম অদু কোয়শীন্দুনা ওপরেসন চত্থবা হৌরকপদা য়ূম অদুদগী মিলিটেন্টশিংনা নোংমৈ রাউন্দ কয়ামরুম কাপথোরকপদগী সেক্যুরিটি ফোর্সনসু য়ূম অদু কোয়শীল্লবা মতূংদা নোংমৈ কাপশীনবগা লোয়ননা মফম অদুদা লৈরম্বা কে এন এফ ( এম সি) গী কাদর অহুমদু ফাগৎখি।লোয়ননা মখোয়দগী অফবা মখলগী খূৎশু-খূৎলায় কয়ামরুমসু ফাগৎখ্রে।

    ঙরাং অয়ূক পূং ৪.৩০ রোম তারকপদা কম্বাইন্দ ফোর্স না ওপরেসন অদু চত্থখিবনি। ফাগৎলবা কে এন এফকি কাদর অহুম অদু চুরাচান্দপুরগী তোর্বূং বংলাদা গেট মৈ থাখিবা, ওইল টেঙ্করশিংদা নোংমৈ কাপশীনখিবা অমসুং হন্দক চিফ মিনিষ্টর নোংথোম্বম বিরেননা জিরিবামদা চৎনবগীদমক সেক্যুরিটিগী এদভান্স পার্টিদা বোম অমসুং নোংমৈ কাপশিন্দুনা অশোক- অপন কয়া মায়োক্নহনখিবা থৌদোকশিং অদুদা হকথেংননা চেন্নবশিংনি হায়বসু খঙবা ঙমখ্রে।

     কে এন এফকি ফারবা কাদরশিং অমসুং খূৎশু-খূৎলায় কয়াদু কম্বাইন্দ টিম্না মফম অদুদগী পুথোরক্নবা হোৎনরিঙৈদা মশীং য়াম্লবা কুকি নূপীশিং থোক্লক্তুনা সেক্যুরিটিগী গারি মমাঙদা থত্তুনা থমখিবগা লোয়ননা কাদর অহুম অদূগা খূৎলায়শিং অদূগা পুখিবা য়ারোই হায়না খোঙজং চঙশিল্লকপদগী কম্বাইন্দ টিম্না ট্যার গ্যাস সেল অমসুং মোব বোমশিং কাপ্তুনা তানখাইরবা মতূংদা খূৎলায়শিং অদূগা কোন্ননা কে এন এফকি ফারবা কাদরশিং অদু পুথোরকখ্রবা মতূংদা মরী লৈনবা পুলিস ষ্টসন্দা শিন্নখ্রে হায়রি।