সেক্যুরিটিগী অকনবা চেকশিন থৌরাং লৌখত্তুনা ইন্নর মনিপুর পারলিয়ামেন্টরি কন্সটিট্যুয়েন্সিগী পোল্লিং স্তেসন ১১দা শান্তি ওইনা রিপোল পাঙথোকপা ঙরাং নুমিদাংৱাইরম মপূংফানা লোইশিনখ্রে। অপূনবগী ওইনা য়েংবদা চাদা ৮১.৬ কি চাংদা ভোৎ থাধনখি। থা অসীগী ১৯ দা পাঙথোকখিবা অহানবা তাঙ্কক্কি মীখলদা ইন্নরগী লোক সভা কেন্দ্রদা তোঙান তোঙানবা পামদবা হীংশাগী থৌদোক কয়া থোকখিবদগী ইলেক্সন কম্মিসন ওফ ইন্দিয়ানা পোল্লিং স্তেসন ১১দা অমুক হন্না মীখল পাঙথোক্নবা খঙহল্লকখিবনি।
ঙরাং অয়ূক পূং তরেত্তগী হৌনা ইন্নরগী পোল্লিং স্তেসন ১১দা ভোৎ থাধনখি। নুংথিলগী পুং মঙা ফাওবা মীখল অদু পাঙথোকখি। হন্দক্কি রিপোল অসিদদি পামদবা থৌদোকশিং অমত্তা থোকখিবা লৈতে। সেক্যুরিতি ফোর্স পার্সনেলশিং অমসুং লৈকায়-লৈকায়শিংগী মশীং য়াম্লবা মৈরা পায়বী ঈমাশিং থোক্লক্তুনা পামদবা হীংশাগী থৌদোক থোকহন্দনবা অকনবা চেকশিন থৌরাং কয়া লৌখৎখি।
অপূনবা ভোটর মশীং ৮,৪৯৩ না মশা-মশাগী অপাম্বা মীরেপশিংদা মনীং তম্না, অকি-অখং অমত্তা য়াওদনা ভোৎ থাধনখি। নূপা ভোটর মশীংনা ৩,৯৯০ নি অদুগা নূপী ভোটর মশীংনা পূন্না ৪,৪৯৭ ওইখি। ইন্নরগী লোক সভাগী রিপোল অসিদা ট্রান্সজেন্দর ভোটর মশীংনা ৬ ওইখি।
