সেক্যুরিতিনা কংলাগী হোজঙশিং লানবনগুম ঙাক-শেন্দুনা লৈবা উবদা মীয়াম্ অকিবা পোক্নখ্রে

রিপব্লিক দে থৌরমগী ফুল রিহরসেল লৈবা চৈরক্তা আরম্বাই তেঙ্গোলনা ষ্টেট লৈঙাক্কী মিনিষ্টর অমসুং এম এল এ শিংগী অপুনবা মফম অমা ইম্ফালগী কংলা মনুংদা  পাঙথোক্নব কৌখিবগা মরী লৈননা কংলাগী হোজঙশিং অমসুং মসিগী আকোয়বা মফম পুম্নমক্তা সেক্যুরিতিগী অকনবা চেকশিন থৌরাং লৌখত্তুনা লান মনুংদা লানবনশিং ঙাক-শেনবগা মান্নন লৈবা উবদা অচৎ- অওকশিং মহৌশাগা মান্নদবা মাওংদা কা হেন্না অকী-তুজুংবা পোক্নখ্রে।

অফবা মখলগী খূৎলাই পায়বা সেক্যুরিতি পার্সনল চা কয়ানা মহৌশাগা মান্নদবা মাওংদা কংলাগী অকোয়বদা অকনবা চেকশিন থৌরাং লৌখত্তুনা লান মনুংদা ঙাক শেনবগা মান্নন লৈখিবা মতৌদা মীয়াম মিপাইবা পোক্নখিবনি।

পনবা য়াবদি, আরম্বাই তেঙ্গোলনা ঙসি অয়ূক পূং ১০ তাবদা ষ্টেট লৈঙাক্কী মিনিষ্টরশিং অমসুং এম এল এশিংগী ওইবা অপুনবা মীফম অমা পাঙথোক্নব সম্মোন থাদুনা কৌরকপদগী লো এন্দ ওর্দর মেন্টেন তৌননবা লৈঙাকনা লৌখৎপা চেকশিন থৌরাং মখাদা ঙাক-শেনখিবদগী অঙকপা মতৌ অসী মীয়াম্না উবা ফংখিবনি।আরম্বাই তেঙ্গোলগী মায়কৈদগী মীফম অসী অহোংবা লৈরোই, হান্না লাউথোকখিবা মফম মতম অমত্তা কায়হন্দন পাঙথোক্কনি হায়রকপদগী  হৌজিকসু অকনবা চেকশিন থৌরাং লৌখৎলিবনি।