রিজনেল ইন্সটিটিউট অফ মেডিকেল সাইন্সেস (রিমস) হোস্পিটাল ইম্ফাল গী ৫৩শুবা মপোক কুমোন থৌরম ঙরাং হোস্পিটাল অসীগী জুবিলি হোলদা চীং-লেম্না, মপূংফানা পাঙথোকখ্রে। মেদিকেল ইন্সটিটিউট অসীগী দিরেক্তর প্রোফেসার জি সুনিল কুমার শর্মা, রেস্পিরেটোরি মেদিসিন দিপার্টমেন্টগী হান্নগী প্রোফেসার এন তোম্বী, ওব্সটেট্রীক্স এন্দ গাইনিকোলোজি দিপার্টমেন্টগী হান্নগী প্রোফেসার কে ঐচ ইবেয়াইমা অমসুং অতৈ শক্নায়রবা ওফিসিয়েলশিং শরুক য়াখি।
থৌরমদুদা ৱা ঙাঙবদা ইন্সটিটিউট অসীগী দিরেক্তর প্রোফেসার জি সুনিল কুমার শর্মনা হায়, হৌখিবা চহী য়াঙ্খৈহুমদোইগী শাংলবা মতম অসীদা মেদিকেল ইন্সটিটিউট অসীনা অনা-লায়েংগী লমদা অহোংবা কয়ামরুম পুরক্তুনা মীওই ক্রোর কয়াগী থৱায় কন্দুনা লাকখিবগী মথক্তা মেদিকেল মহৈরোয় কয়া কয়াসু পুথোক্তুনা খুনাই অসীদা মেদিকেলগী হীরমদা অচৌবা অহোংবা পুরকপা ঙমখ্রে। দেন্টেল কল্লেজ, নর্সিং ইন্সটিটিউট নচিংবা কয়ামরুম ইন্সটিটিউট অসীগী মখাদা হাংবা ঙম্লে। মায় পাক্না মহৈরোয় কয়া পুথোকপসু ঙমখ্রে হায়খি।
হোস্পিটাল অসিদা মতমগা চানরবা টেক্নোলোজি, ইক্বিপমেন্ট কয়াগী মতেংনা অনা- লায়েং চত্থবদা কা হেন্না খূমাঙ চাওশীনবা ঙম্লক্লি হায়না থৌরম অদুদা অথোয়বা মীথূংলেন ওইনা শরুক য়াখিবা দিরেক্তর প্রোফেসার জি সুনিল কুমার না ফোঙদোকখি।
