রিমসতা ন্যুরো নেভিগেসন সিষ্টেম মেচিন শঙ্গাখ্রে

রিজনেল ইন্সটিট্যুট ওফ মেদিকেল সাইন্সেস (রিমস) হোস্পিতালগী ন্যুরো নেভিগেসন সিষ্টেম মেচিন ঙরাং হোস্পিতাল অসিগী দিরেক্তর সুনিল কুমার শর্ম্মানা মায়খূম হাংদোক্তুনা শঙ্গাখ্রে।
থৌরম অদুগা মরী লৈননা দিরেক্তর অসিনা হায়, ন্যুরো নেভিগেসন সিষ্টেম হায়বসি খ্বাইদগী মরুওইবা অমসুং য়াম্না এদভান্স ওইরবা টেক্নোলোজী অমনি। টেক্নোলোজী অসি ব্রেনগী নার্বতা অমসুং স্পাইনেল কোর্দতা সর্জরি পাঙথোকপা মতমদা শীজীন্নগদবনি। মেচিন মখল অসী ওটোমোবাইল অমসুং মোবাইল ফোনশিংদা শীজিন্নরিবা নেভিগেসন সিষ্টেম অদুগা চাংদম্নবা য়াই। ন্যুরো নেভিগেসন সিষ্টেম অসিনা ব্রেনগী অমসুং স্পাইনেল কোর্দকি ওইবা অরুবা ওপরেশন পাঙথোক্নবা হোৎনবদা মথৌ তৌগদৌরিবা সর্জন, অতৈ দাক্তরশিং অদুদা লমজিং লমতাকপগী থবক তৌগদবনি হায়খি।
ওপরেশন পাঙথোকপা মতমদা অকোয়বদা লৈবা নার্ব অমসুং ভাষ্কুলর ষ্ট্রকচরশিং মশক খঙদোক্তুনা টারগেৎ তৌরিবা পোইন্ট অদুদা চপ-চানা সর্জরি চত্থবা ঙমহনগনি হায়বা ৱাফম দাঃ সুনিল কুমারনা ফোঙদোকখি। হায়রিবা মেচিন মখল অসি সর্জরিগী থবক থৌরমশিংদা য়াওরকপা অসিনা হীরম অসোমদা কা হেন্না কান্নবা ফংহল্লগনি। ন্যুরো নেভিগেসন টেক্নোলোজী হায়বসি হৌজিক্কী মতমদা অসোয়- অঙাম য়াওদ্রবা হায়বদি ইরর লৈতবগা লোয়ননা মশা-মঊ ফরিবা টিশুশিংদা অমাঙ- অতা অমত্তা থোকহন্দবগা লোয়ননা ইফেক্টকি অকিবা য়াওদ্রবা সিষ্টেম অমনি।
ঙরাংগীগী থৌরম অদুদা রিমস হোস্পিটিলগী মরুওইবা ওফিসিয়েল কয়া শরুক য়াখি।