ষ্টেট লৈঙাক্না লমদম অসীগী লায়রবা মীয়ামগী অনা-লায়েংবদা মতেং পাংননবা হৌদোকখিবা চিফ মিনিষ্টরগী হকশেলগী তেংবাং (সি এম ঐচ টি) হায়রিবা অদু প্রাইভেট হোস্পিটালশিংদা চৎনররোই হায়না ষ্টেট কেবিনেট মীফমদা ৱারেপ লৌখিবা অসী খ্বাইদগী লাইবক থীবা অমনি। সি এম ঐচ টি গী খুদোংচাবা অসী মখাতানা সধারন মীয়ামদা ফংহনবগী মথক্তা অতৈ মখাতাবা হকশেলগী খুদোংচাবা কয়াসু ফংহন্ননবা অনৌবা থৌরাংশিংসু লৌখৎফম থোকই হাৎনা মনিপুর প্রদেশ কংগ্রেস কম্মিটিগী সেনিয়র স্পোক্সপার্সন এন ভূপেন্দা না ফোঙদোকখ্রে।
ইম্ফালগী বির টিকেন্দ্রজিৎ রোদতা লৈবা কংগ্রেস ভাবন্দা পাউমীশিংগা উনখিবা থৌরম অমদা মহাক্না ৱাফম অসী ফোঙদোকখিবনি। মনিপুর লৈঙাক্কি কেবিনেট মীফমদা লৌবা ৱারেপশিং মীয়ামদা খঙহন্ননবা সোসিয়েল মেদিয়াদা থাগৎকনি হায়খ্রবসু ঙসিফাওবা থাগত্তনা লৈরি, দি আই পি আরগী ৱেবসাইটতা থাগৎকনি হায়খিবা অদূসু থাগৎপা উদ্রি হায়না মহাক্না ফোঙদোকখি।
হৌখিবা আগষ্ট কি কুনথ্রাদসু ষ্টেট লৈঙাক্কি কেবিনেট মীফম পাঙথোক্তুনা এজেন্দা কয়ামরুম খন্নদুনা ৱারেপ কয়া লৌখ্রে। মীয়াম্না কা হেন্না অৱাবা খুদোংচাদবা কয়া মায়োক্নরগা লৈরিঙৈ চৈরক্তা সী এম ঐচ টিগী খুদোংচাবা লৌথোকখিবসি অমুক হন্না রিভ্যু তৌরগা রিভোক তৌবিয়ু হায়না মহাক্না মখা তানা ফোঙদোকখি।
