প্রাইম মিনিষ্টর মনিপুরদা চৎননবা রাহুলনা অমুক হন্না তকশীনখ্রে

মনিপুরদা হৌজিক মায়োক্নরিবা অকনবা হীংশাগী ঈরাং অসী লাকশীন্ননবা সেন্ট্রেল অমসুং ষ্টেট গভর্নমেন্ট অনীনা নীঙথীজনা খূৎশম্নরগা থবক পায়খৎনবা হোৎনবগা লোয়ননা মনিপূরদা মশামক থুনা য়াঙনা চঙশীন্দুনা মীয়ামগী খুদোংচাদবা কয়া মায়োক্নরিবা অসী কোকহল্লু হায়না লোক সভাদা ওপ্পোজিসন লিদর ওইনা লৈরিবা কংগ্রেস লুচিংবা রাহুল গান্ধীনা অমুক হন্না প্রাইম মিনিষ্টর নরেন্দ্র মোদি গী মফমদা  তকশীনখ্রে।

মনিপুরদা থোক্লিবা হীংশাগী ঈরাং অসীবু লাকশীন্ননবা হোৎনদুনা লাক্লিবা মীহুৎ কাঙবূ অমগা উনরবা মতূংদা রাহুল গান্ধী না প্রাইম মিনিষ্টরগী মফমদা মনিপুরদা খূদক্তা চঙশীন্দুনা মীয়ামগী খুদোংচাদবা মায়োক্নরিবা অসী কোকহল্লু হায়না ফোঙদোকখিবনি। ঈরাং অসীনা নুংশিরবা মমা-মপা, মরী-মতাশিং কায়নহল্লে হায়না মনিপুরগী মীহুৎশিং অদুনা রাহুল গান্ধিদা পাউদমখি হায়রি। ঈরাং অসীনা নুংশিরবা মমা-মপা, মরী মতা কায়নহনখ্রে, তুংগী আসা লৈরিবা মমল য়াম্লবা মীওই চা কয়াগী পুন্সি পিখম্নহনখ্রে হায়বা ৱাফম কয়াসু গান্ধী দা ফোঙদোক্লমখিবা মীওইশিং অদুনা মখোয়গী অশেংবা মশক মমীং ফোঙদোকপদি পামখিদে হায়রি।

মমাঙ চহীগী মে অহুমদগী ঙসীফাওবা লেপ্পা লৈতনা চত্থরক্লিবা হীংশাগী ঈরাং অসীনা লমদম অসীদা মীওই চনীগী মথক্তা থৱায় মাঙহনখ্রবনি। ভাইওলেন্স অসী থোক্লকখ্রবা মতূংদা রাহুল গান্ধী না মনিপুরদা অহুম্লক লাকখ্রবনি। মমাঙগী চয়োলদা লাকখিবা অকোনবগী মহাক্কি মনিপুর খোঙচৎ অদুদসু মহাক্না প্রাইম মিনিষ্টর নরেন্দ্র মোদি মনিপুরদা শোয়দনা লাকফম থোকপনি হায়না ফোঙদোক্লমখিবনি।