মনিপুরদা হৌজিক থোক্লিবা হীংশাগী ঈরাং অসীগী শরুক অমা ওইনা কুকি মিলিটেন্ট শিংনা নেস্নেল হায়ৱে থিংজিনবা, নোং কন্না তাবদগী চীঙ নীঙখায়বা, লম্বী নীঙখায়বা, লম্বী নমথখিবা, রোংমৈ নাগা কাউন্সিলনা টোটেল সটদাওন তৌখিবনচিংবা তোঙান তোঙানবা মরম কয়াদগী জিরিবাম- ইম্ফাল লম্বী অমসুং দিমাপুর- ইম্ফাল লম্বী ফাওনখিদবা মরম্না পেট্রোল অমসুং দিজলগী অৱাৎপা লৈরগনি হায়বগী মিপাইরবা মীয়াম্না মনিপুরদা লৈরিবা পেট্রোল পম্প শিংদা থোমজিন্নরক্তুনা ক্যু শাংনা-শাংনা লেপ্নদুনা মশা-মশাগী শীজিন্নগদবা চাংদগী হেন্দোক্না পেট্রোল অমসুং দিজলগী পোৎলমশিং লৌশীনহৌনবা হোৎনরি।
পেট্রোল পম্প অয়াম্বদদি থোং হাংনদ্রবসু অকোয়বদা লৈরিবা লম্বীগী চিদাইদা লন্নাই কারবার তৌবা মীওইশিংনা মমল হেন্না লৌদুনা আইনগী ৱাংমদা মীয়াম্না পেট্রোল, দিজল মরাং কায়না ফংনরি। অসীগুম্বা আইন কায়বা থৌওংশিং মখা তানা চত্থরম্বা থেংনরবদি অকনবা আইনগী থবক লৌখত্তুনা চৈরাক পীরগনি হায়না ষ্টেট লৈঙাক্কি কঞ্জুমর এফিয়ার্স, ফুদ এন্দ পব্লিক দিষ্ট্রিব্যুসনগি দিরেক্তর রোবার্টসন আসেমনা মাঙজৌননা অকনবা নোটিফিকেসন থোক্তুনা মীয়াম অমসুং মরী লৈনবা পূম্নমক্তা খঙহনখ্রে।
মনিপুরগী দিষ্ট্রিক্ট ১৬ মক্কি পুলিশকি এস পি শিংদা ৱাফম অসীগা মরী লৈননা নোটিস থাখিবগা লোয়ননা মশা-মশাগী এরিয়া, জুরিসদিক্সন মনূঙদা অসীগুম্বা আইননা য়াদবা থৌওংশিং চত্থবশিংগী মথক্তা অকনবা এক্সন লৌখৎকদবনি হায়না দিরেক্তরনা খঙহনখি।
