হন্দক নেস্নেল ন্যুজ চেন্নেল অমগা উনখিবা মতাং অমদা আসাম রাইফলসকি হান্নগী দিরেক্তর জেনরেল ওইনা লৈরম্বা লেফটেনেন্ট জেনরেল প্রবিন চন্দ্রন নায়র না মনিপুরদা হৌজিক থোক্লিবা হীংশাগী ঈরাং অসীগী হৌরকফম, মনূংগী ওইবদা হৌজিক করি করম্বা ফীভমশিং মায়োক্নরিবগে, কনানা অহানবদা হৌরকখিবা হীংশানো, করি মরমগী হীংশাগী ঈরাং অসী থোক্লকখিবনো অদূগা কুকি- মিলিটেন্ট শিংনা করম্বা লাল্লোং চত্থরক্লিবগে হায়বগী মতাংদা খঙদি অমত্তা খঙদনা অখঙ- অহৈ শাদুনা ৱাফমশিং ফোঙদোকখিবদু য়াম্না মথোঙ হুক্তবা, অঙাঙমচা মানবা ৱাখল মপূং ফাদবগী মতৌ ঊৎপনি হায়না মনিপূর পুলিসনা কন্না য়ানীংদবা ফোঙদোকখ্রে।
নায়রনা, মনিপুর পূলিস কৌবা অমত্তা মনিপুরদা লৈতে, মৈতৈ পুলিস, কুকি- পূলিস হায়বদি লৈ হায়না য়াম্না লৈবাক মচা তাদনা অমসুং কম্যুনিটিশিংগী মরক্তা তোখাই তানিংবা পূক্নিংগী ইথিল পোকহনবা য়াবা ৱাঙাঙ ফোঙদোকখিবদু আইনগী মায়োক্তনি, লৈবাক অসীগী য়ুনিটি ইন-দাইভর্সিটি, সেক্যুরিটি অমসুং নেস্নেলিজমদা ফোংনা শীঙনরকপনি হায়না মনিপুর পুলিসকি আই জি মুইভা না ফোঙদোকখিবনি।
পি সি নায়র অসী হৌজিক মনিপুরদা কুকি- মিলিটেন্ট শিং অমসুং অসাম রাইফলস অনীনা মতেং পাংনরগা মীটৈগী মীচম মীয়ামদা চত্থরক্লিবা লান অসীদা শৌগৎপা মী অমা ওইনা অসাম রাইফলস পু মীয়াম্না, মরুওইনা মীটৈ মীয়াম্না য়াদ্রিবা অসী ময়েক শেংনা খঙলবা মীওই অমা ওইবনা ৱা থৈদোকফম থিরকপদা ওইদ-পাদবা ময়ামসি ফোঙদোরক্লিবনি হায়না মায়কৈ কয়াদগীসু মরাল শীনরক্লিবনি। অসাম রাইফলস না অরানবা অমা কূপশীন্ননবা হোৎনবদা অরানবা চাম্মা চাম্মা শাগৎলকপনি হায়রি। বি জে পি মনিপুর প্রদেশকি য়ুব মোরচানসু নায়রগী মথক্তা কোর্টতা কমপ্লেন্ট থাঙ্গৎকদৌরি অদুগা ওল মনিপুর ৱার্কিং জর্নেলিষ্ট য়ুনিয়ন ( অমজু) গী মায়কৈদগীসু মহাকপু কন্না য়ানিংদবা ফোঙদোকখিবা লৈরিবনি।
