পাম্বৈনা লুচিংবা য়ু এন এল এফনা ফাগৎলকপা য়াম্লবা দ্রগ মৈরা পায়বীশিংদা শিন্নরবা মতূংদা পুল্লপ মৈ থাদোক্তুনা মাঙহনখ্রে

ইম্ফাল মে ২২:পাম্বৈনা লুচিংবা য়ু এন এল এফ না ফাগৎলকপা য়াম্লবা দ্রগকি পোৎলমশিং লাঙ্গোল অপূনবা মৈরা পায়বী অমসুং য়ু এম ওদা শিন্নরকখ্রবা মতূংদা পুল্লপ পৈখৎলগা মীয়ামগী মমাঙদা মৈ থাদোক্তুনা মাঙহনখ্রে । দ্রগশিং অদু মেদিয়াপার্সনশিংগী মমাঙদা মৈ থাদোক্তুনা মাঙহনখিবনি।
কারবার অসিদা চেন্নবনি হায়বা মীওই অনীসু ফাগৎপা ঙমখ্রে। ফাগৎপা ঙমখ্রবা মীওই অনিদুদি- নোংথোম্বম মেঘজিৎ, লৈফম্না ইম্ফাল নোংচুপ পানাগী মনুংদা লৈরিবা নাউরেমথোং অমসুং ঙারিয়ানবম হীটলর, অপোকপা লৈখিদ্রবা কবোকনি, লৈফম্না ইম্ফাল নোংচুপ পানাগী সগোলবন্দ লুক্রাম লৈরক, সেন্ট জোসেফ স্কুল মনাক্তগিনি হায়রি।
লাঙ্গোল নিংথৌ লৈকায় কম্যুনিটি হোলদা পাঙথোকখিবা পাউগী মীফম অমদা পাম্বৈনা লুচিংবা য়ু এন এল এফকি মেদিয়া কোর্দিনেটর চরাইরোংবনা হায়, দ্রগ অমদি ময়াই কাবা চীঞ্জাক্কি পোৎলমশিং পুথোক-পুশিন তৌদুনা লৈরে হায়বা পাউ অমা ফংবদগী অখন্নবা টিম অমনা চঙশীন্দুনা থি-হূম্ব গী থবক চত্থবদা কংলা দ্রগস এন্দ সর্জিকেলস ফার্মাসি নাউরেমথোং অমসুং সঙাইপ্রৌদা লৈবা গোদাওন অমদগী য়াম্লবা দ্রগশিং অদু ফাগৎপা ঙমখিবনি। হায়বা ৱাফম ফোঙদোকখি
মখাতানা লূপ অসীনা দ্রগকা মরী লৈনবশিংগী মায়োক্তা হেন্না কনশীনবা দ্রাইব চত্থরগনি। চেন্নবশিং অহকপা চৈরাক পীননবা শেম শারে। মরম অদুনা মরী লৈনবা খূদিংমক্না ঙসীদগী মশা-মশাগি খোঙফম হন্দোক্কদবনি হায়না মহাক্না অকনবা ৱার্নিং তৌখি