পাম্বৈগী কাঙবূনা মহয় চাবা য়াবা উপাল চারা কয়ামরুম থাখ্রে

চহী খূদীংগী ওইনা মালেমগী মফমশিং শীন্থুংনা পাঙথোক্নরিবা ৱারল্ড এনভাইরনমেন্ট দেগী থৌরম মনিপুরদসু মফম কয়াদা পাক- সন্না পাঙথোকখিবা চৈরক্তা পাম্বৈ কাঙলূপকি য়ু এন এল এফ কি লূপলোয়শিংনা লুচিংদুনা চাবা য়াবা উহৈ পানবা উ চারা কয়ামরুম থাখ্রে।

লেন্দ রেষ্টোরেসন, দিজার্টিফীকেসন এন্দ দ্রাউট রিসিলিয়েন্স হায়বা থিমদা মালেম পূম্বদা পাঙথোকপা হন্দক চহীগী থৌরম অসীগী মনূং চন্না লূপ অসীগী থৌবাল দিষ্ট্রিক্ট কি সেক্রেটরি ৱাই লীক্লাঙম্বা মীটৈ, ব্রিগেট থ্রীগী কম্মান্দর মেজর খনবা, কে সি পিগী জেনরেল সেক্রেটরি লেম্বা, সেক্রেটরি ওরগানাইজেসন লোইখোম্বা, কোইজম মরিং ভীল্লেজগী চ্যেরমেন নেচা, য়ুনিভর্সেল মাদর্স ওরগানাইজেসন (য়ু এম ও) থৌবাল দিষ্ট্রিক্ট কি জেনরেল সেক্রেটরি ওইনা লৈরিবা ঈমা ও মনোরামা, কোইজম মরিং ভীল্লেজগী উইমেন সোসাইটিগী সেক্রেটরি বিনা মরিং, অথোকপম মৈরা পায়বী লূপকি এদভাইজর ঈমা সোবিটা, লংথাবাল খূনৌ মৈরা পায়বী লূপকি প্রসিদেন্ট ঈমা সেঞ্জম সান্টি, ককচীং মৈরা পায়বী লূপকি ঈমা কলপনা অমসুং মেরি য়ূম্নাম্না থৌরম অদূগী ময়ায় তাঙবল লৌখি।

য়ু এন এল এফকি থৌবাল দিষ্ট্রিক্ট কি সেক্রেটরি লীক্লাঙম্বা মীটৈ না হায়, হৌজিক মালেম অসীদা অঈং-অশাগী খল কায়থরকপদগী শাবগী চাং হেঙ্গৎলকপা অমসুং মীওইবগী পুন্সিদা হীরম খূদীংদা অকায়বা পীরক্লিবসি উমং-ৱামং পাক-সন্না কোকথোকপদগীনি। মরম অসিনা ঐখোয় খূদীংমক্না উ চারা থাবগী থবক খক কাউরোইদবনি অদুগা উ-ৱা য়ান্থৎপগী হৈনবি থম্লোইদবনি হায়খি।