ষ্টেট অসিদা লৈরিবা বি জে পিনা লুচিংবা লৈঙাক অসীনা ষ্টেট এসেমব্লিগী নিংথম মীফম কৌবগী মতম থাখায় হেঞ্জিল্লক্লবফাওবা অসীদা মীফম পাঙথোক্ননবা সম্মোন তৌবগী ফীভমশিংসু অমত্তা উবা ফংদে, হৌজিকফাওবা মীফম কৌননবা শেম শাবসু লৈতে। লৈঙাক অসীনা কন্সটিট্যুসনগী প্রোবিজনশিং ইফোং ফোংনা খোঙ্গাওনরি হায়না মনিপুরগী হান্নগী চিফ মিনিষ্টর অমসুং কংগ্রেস লেজিসলেচর পার্টিগী লিদর ওক্রম ইবোবিনা নুংনাংবগা লোয়ননা পেন্দবা ফোঙদোকখ্রে।
এসেমব্লিগী নিংথম মীফম অসী কেলেন্দরগী মতূং ইন্না পাঙথোকফম থোকপা মতমদি হেঞ্জিল্লক্লবনি। কৌরক্কদ্রা খন্দুনা ঙাইদুনা লাকপনি অদূবু মীফম কৌননবা করিগুম্বা থৌরাং অমত্তসু পায়খৎলকপগী মমি তাদ্রি। থৌওং অসিদি কন্সটিট্যুসন্না পীরিবা আর্টিকল ১৭৪- রুল ওফ প্রোসিজর, কন্দক্ট ওফ বিজিনেস কি রুল নম্বর ১৭- এ খোঙ্গোয়নবনি হায়খি।
ইম্ফালগী বি টি রোদতা লৈবা কংগ্রেস ভাবন্দা পাঙথোকখিবা পাউমীশিংগা উনখিবা থৌরমদা ইবোবিনা ৱাফম অসী ফোঙদোকখিবনি। এসেমব্লিগী নিংথম মীফম অসী থেঙলবসু থেঙনা চৎলিবা দিসেম্বর থা অসিদা কৌননবা মনিপুরগী গভর্নর, চিফ মিনিষ্টর অমসুং এসেমব্লিগী স্পিকরনচিংবদা কংগ্রেস পার্টিগী মায়কৈদগী মেমোরেন্দমশিং পীশীনখ্রে হায়নসু মহাক্না ফোঙদোকখি। পাউমীশিংগা উনখিবা থৌরম অদুদা এম এল এ কাঙুজম রঞ্জিৎ, থোকচোম লোকেশ্বর, এম পি সি সি গী প্রসিদেন্ট কৈশাম মেঘচন্দ্র অমসুং অতৈ লুচিংবা কয়াসু শরুক য়াখি।
