বি জে পিনা লুচিংদুনা হৌজিক লৈরিবা সেন্তরগী মপাঙ্গল কল্লবা লৈঙাক অসী পাকিষ্টান্না তুংকোইনা লৈহনবা পামদে, ইন্দিয়াগী য়ূমথংনরিবা য়েক্নবা লৈবাক অসিগী অপাম্বা অমা হায়বা তারবদি মখোয়না হায়বতা ইন্দুনা লাকখ্রবা কংগ্রেস পার্টিনা সেন্তরদা সাসন পায়রকপা অদুনি, রাহুল গান্ধীনা প্রাইম মিনিষ্টর ওইরকপদুনি। মসী ওইরবদি পাকিষ্টানগী মঙলানশিং অদু মঙফাওনহনবা ঙমজরগনি হায়না য়ূমথংনরিবা য়েক্নবা লৈবাক অসিনা খঞ্জরিবনি হায়না প্রাইম মিনিষ্টর নরেন্দ্র মোদিনা অকনবা মওংদা ফোঙদোকখ্রে।
ঙরাং গুজরাটকি আনন্দ লমদমদা পাঙথোকখিবা ঈলেক্সন রেল্লি অমদা শরুক য়ারদুনা নরেন্দ্র মোদিনা মহাক্কী ৱাফম অসি ফোঙদোকখিবনি। মদুগী মমাঙদা হান্না পাকিষ্টানগী প্রাইম মিনিষ্টর ইমরান খানগী লৈঙাক্তা মিনিষ্টর ওইনা লৈরম্বা সি ঐচ ফৱাদ হুসেইন না রাহুল গান্ধীনা পীখিবা স্পিচ অমা থাগৎপা ফোঙদোকখিবা অমগী মতাংদা রিয়েক্ট তৌরদুনা মোদিনা মহাক্কী অকনবা এট্টেক অদু ওপ্পোজিসন কংগ্রেস অমসুং পাকিষ্টান্দা খূৎ থিল্লদুনা থম্লকখিবনি।ইন্দিয়াদা কংগ্রেস পার্টিনা শিথরকপা উরগা পাকিষ্টান্না মমীত্তগী পি শিন্থরগা কপ্লি।
লৈবাক অসিগী লুচিংবশিংনা ইন্দিয়াদা কংগ্রেস হিঙ্গৎলক্নবা তাইবংগী মপূ মহাক্কী মফমদা প্রেয়র তৌবগা লোয়ননা সহেজাদা (রাহুল গান্ধী) অসিবু প্রাইম মিনিষ্টর ওইহন্নিংলি। কংগ্রেস পার্টি অসি পাকিষ্টানগী মুরিদ হায়বদি মতূং ইন্দুনা চৎলিবা খোঙবূরোই অমনি হায়বসি ইন্দিয়ানশিংনা মতম কয়াদগি খঙনরক্লবনি হায়না মহাক্না ফোঙদোকখি। কংগ্রেস পার্টিগী অশোনবা লৈঙাক অদু ইন্দিয়াদা অমুক হল্লকপা হায়বসি পাকিষ্টানগী অপাম্বা অদুনি। ইন্দিয়াদা টেরর এক্সপোর্ট তৌরম্বা লৈবাক অসি ঙসিদি মালেমগী লৈবাকশিংদগী অত্তা ইম্পোর্ট তৌদুনা য়াম্না ফীভম চাদনা হিংলিবনি হায়না প্রাইম মিনিষ্টর নরেন্দ্র মোদিনা ফোঙদোকখি।
