তরানিপালশুবা লোক সভা মীখলগী অনিশুবা তাঙ্কক্কি মীখল ঙসী অয়ূক পূং তরেৎ তাবদগী মীয়াম্না ভোৎ থাধবা হৌখ্রে। লোক সভা সিট অসিদা কেন্দিদেট মরিনা লম্বা থেংনরি। মখোয় মরিগী লাইবক ঙসী লেপ্লগনি। ঙরাং অমসুং নহান্দগী হৌনা মীখল অসিদা মথৌ পাঙথোক্কদবা পোল্লিং পার্সনেলশিং মাগী মাগী মরী লৈনবা পোল্লিং স্তেসনশিংদা খোঙশানখ্রবা মতূংদা তেক্ত-কায়দনা, অশোয়- অঙাম য়াওদনা থুংনখিবনি। মথৌ পাঙথোক্কদবা মশীং য়াম্লবা সেক্যুরিতি পার্সনেলশিংসু পোল্লিং ষ্টেসনশিংদা মাঙজৌননা য়ৌনখ্রবনি।
মীরেপ মরিগী মরাইবক লেপ্ননবা ভোটর ৪,৮৪,৯৪৯ না ঙসী অয়ূক পূং তরেৎ তাবদগী নুমিদাংৱাইরম পূং মরী তাবফাওবা ভোৎ থাধনগনি।লোক সভা সিট অসীগী ওইনা এসেমব্লি সেগমেন্ট ১৫ দা ভোটরশিংনা এপ্রিল ১৯দা পাঙথোকখিবা অহানবা তাঙ্কক্কি মীখল অদুদা ভোৎ থাধনখিবনি। লেমহৌরিবা দিষ্ট্রিক্ট নিপানগী এসেমব্লি সেগমেন্ট ১৩গী ওইনা ঙসী ভোৎ থাধবা হৌখিবনি। ঙসী আউটরগী লোক সভা সিটকি এসেমব্লি সেগমেন্ট ১৩গী মীখল পাঙথোক্লিবা অসিদা নূপা ভোটর ২,৩৯,১৪০ অমসুং নূপী ভোটর ২,৪৫,৮০৭ না মখোয়গী অপাম্বা মীরেপশিংদা মমল য়াম্লবা খূবীগী সিল নমদুনা মীরেপশিং খন্ননবা হোৎনরি।
মীখল অসিদা পোল্লিং ষ্টেসন ৮৪৮ হাংদোক্তুনা শান্তি ওইনা অমসুং পামদবা থৌদোক অমত্তা থোকহন্দনবা ইলেক্সন কম্মিসন ওফ ইন্দিয়ানা অকনবা থবক পায়খৎলি। হায়রিবা পোল্লিং ষ্টেসনশিং অসীগী মনুংদা ষ্টেসন ২০২ দি নূপী পার্সনেলশিং খক্তনা মথৌ তৌরি।অতোপ্পা পোল্লিং স্তেসন অমনা হকচাংগী ফীভম ততোঙাল্লবা পার্সনেলশিং খক্তনা মথৌ তৌরি। আউটরগী ওইনা পোল্লিং স্তেসন ২২ দি মোদেল পোল্লিং ষ্টেসনশিংনি হায়না লাউথোক্লি। ঊখ্রুল, তেংনৌপল অমসুং জিরিবাম দিষ্ট্রিক্টতা লৈরিবা লাঞ্জেন্নরগা লৈবা মীওইশিংগীদমক অখন্নবা পোল্লিং স্তেসন ৯ হাংলি। হায়রিবা দিষ্ট্রিক্ট শিং অসিদা পূন্না লাঞ্জেন্নরক্লবা ভোটর ৫২৯ লৈরি। পূন্না পোল্লিং পার্সনেল ৩৪০০ না অনীশুবা তাঙ্কক্কি মীখল অসিদা মথৌ তৌরি।
