মীওইবগী থৱায় কনবগা মরী লৈনরিবা মেদিকেল ষ্টাফশিংগী মনূংদা খ্বায়দগী মরুওইবা থৌদাং পুরিবা নর্সকি শিনফমদা লৈরিবশিংনা কত্থোকপগী ৱাখল্লোনগা লোয়ননা মিনুংশি চাউবা, মীগী অৱাবদা হেন্না ৱাবিবা, শাউগন্দবা, অখাঙ কনবা লোয়ননা য়াম্না মীৎ-না শিংনা হৈথোই- শিংথোইবা মথৌ তাই হায়না শিজ হোস্পিটালস এন্দ রিছার্স ইন্সটিট্যুটকি চ্যেরমেন দা. খূন্দোংবম পালিন্না ফোঙদোকখ্রে।
ঙরাং লাঙ্গোলদা লৈরিবা লাঙ্গোল লাইমনাই অপূনবা কম্যুনিটি হোলদা শীজ একাদেমি ওফ নর্সিংগী তরুকশুবা বেচতা বি এস সি নর্সিং তম্লিবা মহৈরোয়শিংগী ওইবা লেম্প লাইটিং এন্দ ওথ টেক্কিং সিরেমোনিগী থৌরম পাঙথোকখিবদা শরুক য়াখিবা দা. পালিন্না ৱাফম অসী ফোঙদোকখিবনি।
থৌরম অদু ফ্লোরেন্স নাইটিঙ্গলগী ফোতোদা ঈকায়খূম্নবা ঊত্তুনা লৈ-শু কত্তুনা হৌদোকখি। মনিপুর নর্সিং কাউন্সিল লম্ফেলপাৎকি রেজিষ্ট্রার ওইনা লৈরিবা দা. অরিবম জামুনা , শীজ ফাউন্দেসন লাঙ্গোলগী সেক্রেটরি সুরেস থোকচোম, শীজ একাদেমি ওফ নর্সিংগী প্রিন্সিপাল দা. সি ঐচ ববিতাসু থৌরম অদুদা শরুক য়াখী। মনিপুরগী নর্স শিং অসি মপান লৈবাকশিংনা য়াম্না পাম্নরিবগী মরুওইবা মরমশিংগী মনুংদা অমা হায়বা তারবদি মখোয়গী চঙখোন্না মথৌ পাঙথোকপা, ঈং-তপ্না থবক তৌবা, মীওইবগী সেবাদা পূক্নিং চঙবা অসীদগী ওইগনি হায়না থৌরমদুদা দা. পালিন্না মখাতানা ফোঙদোকখি।
