নুমিৎ ১৩নি চূপ্না চত্থরকখিবা ষ্টেট লেজিসলেটিব এসেমব্লিগী তরুকশুবা মীফম লোইশিনখ্রে, ঈরাং শাগৎলবদি হাওসকি মেম্বর ওইরবসু লিগেল এক্সন লৌখৎকনি: সি এম

মমাঙ থা জুলাই গী ৩১  দগী হৌনা চত্থরকখিবা, ১২শুবা মনিপুর লেজিসলেটিব এসেমব্লিগী তরুকশুবা মীফম নুমিৎ ১৩নি চূপ্না চত্থরকখিবা মতূংদা ঙরাং মপূংফানা লোইশিনখ্রে। ঙরাং লোইশিনবা নুমিত্তা মনিপুর এপ্রোপ্রিয়েসন (নম্বর ৫) বিল,জল ২০২৪(বিল নম্বর ১২ ওফ ২০২৪) হাওসনা কূপ্না খন্নরবা মতূংদা য়েৎনবা লৈতনা পাস তৌখি। বিল অদু পাস তৌরবনিনা শেনবা-চহী ২০২৪-২৫গী ওইনা তোঙান- তোঙানবা দিপার্টমেন্ট শিংগী পাস তৌখিবা শেনফমশিং শীজিন্নবা য়ারগনি।

ঙরাংসু মমাঙগী নুমিৎশিংদা পাঙথোকখিবগুম ৱাহং-পাউখুম, কোল্লিং এট্টেন্সন মোসন্নচিংবা কয়া চত্থখি। লেমহৌবা দিমান্দ তরেৎকি শেনফমসু হাওসনা য়েৎনবা লৈতনা পাস তৌখি।ওপ্পোজিসন কংগ্রেস কি এম এল এ মঙাদি চৎলিবা থা অসিগী মাপনদা সভাদগী ৱাল্ক- আউট তৌখিবা মতূংদগী হন্দক্কি এসেমব্লি সেসন অসীগী মখা তাবা মীফমশিং য়াওররোই হায়না ফোঙদোকখিবগী মতূং ইন্না ঙরাং সেসনগী অরোয়বা নুমিত্ত সু শরুক য়াখিদ্রে।

ওপ্পোজিসন মেম্বরশিং অমত্তা য়াওখিদবনা তোঙান- তোঙানবা দিমান্দ তরেৎকি শেনফম অদু য়েৎনবা অমত্তা য়াওদনা পাস তৌখিবনি। ঙরাং সেসনগী অরোয়বা নুমিত্তা, য়েলহৌমী কন্ননবা ষ্টেট লৈঙাক অসীনা কন্না হোৎনরিঙৈ চৈরকশিদা অরানবা ৱাফম কয়া শন্দোক্তুনা মীয়াম্বু লান্না লমজীংনবা হোৎনরক্লবদি হাওসকি মেম্বর ওইরবসু লিগেল এক্সন লৌখৎকনি হায়না চিফ মিনিষ্টর নোংথোম্বম বিরেন্না ফোঙদোকখি।