নোরথ ইষ্ট ভিজন প্লান ২০৪৭ তা চিন ষ্টেট ওফ মনিপুর হায়বা ৱাফম পল্লিবসি বি জে পি লৈঙাক্না মনিপুরবু মচেৎ তানা থুগাইনবা থৌরাং তৌরিব্রা: মেঘচন্দ্র

বি জে পিগী সেন্টর অমসুং মনিপুরদা লৈরিবা দব্বল ইঞ্জিনগী লৈঙাক অসীনা মনিপুরবু মচেৎ কয়া থোক্না থুগাইদুনা মনিপুরগী মেপ শেত্তত্তুনা চিন ষ্টেট অমা শেম্ননবা হোৎনরক্লিবা অসী মনিপুরগী মীয়াম অমসুং কংগ্রেস পার্টিনা কৈদৌনুংদা য়াবা ঙম্লোই অমসুং মায় পাকহল্লোই, সেন্টরনা লৌরক্লিবা ফিরেপ অসীগী মায়োক্তা লমদম অসীগী য়েলহৌমী অমা হিংলিফাওবা থেংনগনি হায়না এম পি সি সিগী প্রসিদেন্ট কৈশাম মেঘচন্দ্র না ফোঙদোকখ্রে।

 গুৱাহাটি গী রাজিব ভবন্দা পাউমীশিংগা উনখিবা থৌরম অমদা, য়ুনিয়ন দোনর মিনিষ্টরনা নোরথ ইষ্ট ভিজন প্লান ২০৪৭ শেম্নবগী দ্রাফট দোক্যুমেন্ট তা মনিপুরগী মেপ্তগী খাইদোক্লগা চিন ষ্টেট শেম্নবগী মতাং অমা পল্লক্লিবসিদা প্রাইম মিনিষ্টর নরেন্দ্র মোদি অমসুং মনিপুরগী চিফ মিনিষ্টর নোংথোম্বম বিরেন্না হৌজিক ফাওবা ৱাফম অমত্তা ফোঙদোক্তনা তূমিন্না লৈশিল্লিবা অসী মনূংদা করি অরোনবা এজেন্দা লৈবনো হায়না মহাক্না হংখি। দোনর মিনিষ্টর জ্যোটিরাদিত্য সিন্দিয়ানা চিন ষ্টেট অমা মনিপুরগী মেপ্তগী শেত্তোক্লগা শেম্নবগী ভিজন অমা পুথোরক্লিবা অসীগীদমক প্রাইম মিনিষ্টর নরেন্দ্র মোদি না মহাকপু খূদক্তা রিজাইন তৌননবা খঙহনফম থোকপনি হায়খি।

 মমাঙ চহীগী মে অহুমদগী কুকি মিলিটেন্ট শিংনা চত্থরক্লিবা হীংশাগী ঈরাং অসীনা চৈথেঙ পীরিবা মনিপুরগী মীয়াম অসীদা হন্দক সেন্টরনা লৌখৎলক্লিবা খোঙথাঙ অসীনা অচাকপা মৈদা ঘী হৈজিনবগুম থোক্লে। মনিপুরগী মী অমা হিংলিফাওবা মসীগী মায়োক্তা লেপকনি হায়না মেঘচন্দ্র না ফোঙদোকখি।