থা অসীগী মঙাদা মনিপুরগী মফম কয়াদা শীৎখিবা অকনবা নোংলৈ- নুংশিৎকা লোয়নবা লেন্না ফূদৎখিবদগী খুঞ্জাশিংগী লৈফম লৈতবগী অৱাবা খুদোংচাদবা কয়ামরুম লৈরিবা অমসুং ইংখোল অমসুং লৌফমশিংদা হৌরিবা মহৈ- মরোং কয়ামরুম মাঙহন- তাকহনখিবা অদুগী তেঙবাং পীননবা ষ্টেট লৈঙাক্না লূপা ক্রোর তরুক কাইথোক্লে হায়না চিফ মিনিষ্টর নোংথোম্বম বিরেন্না ফোঙদোকখ্রে। লাইবক থীবা অকীবা থৌদোক অদুদা চাউরাক্না য়ূম ১৫,৪২৫ হেন্না অমাঙ- অতা মায়োক্নখিবনি।
ঙরাং চিফ মিনিষ্টর সেক্রেটরিয়েত্তা পাঙথোকখিবা পাউগী মীফমদা নোংথোম্বম বিরেন্না হায়, মনিপুরদা অকনবা হীংশাগী ঈরাং মায়োক্নদুনা মীয়াম্না অৱা -অনা কয়ামরুম মায়োক্নরগা লৈরিঙৈ চৈরক্তা হন্দক অমুক অকনবা নোংলৈ- নুংশিৎকা লোয়নবা লেন্ অমসুং ব্রজ তারকখিবা থৌদোকশিংদা মীওই কয়া অচৌবা অৱা-চৈথেং মায়োক্নরগা লৈহনখ্রে । মমাঙদা লেন য়াওনা অকনবা নোংলৈ- নুংশিৎ কয়ামরুম মায়োক্নরগা লাকখ্রবশু থা অসীগী মঙাদা শীৎখিবা অদুগা মান্ননা অমাঙ- অতা থোকখিদ্রি। মসিদি ঈপা-ঈপূশিংগী পাউরৌদা লু কোকপদা লেন্না থোমজীনবা হায়বা অদুম্মক থোক্লে হায়না চিফ মিনিষ্টরনা ফোঙদোকখি।
মকোক-মরূ পান্দবগী থৌদৌ-থৌওংশিং ঐখোয়গী মীৎমাঙদা উরি, থকশী-খাশিগী মওং মতৌ কয়ামরুম মাঙশীল্লক্লিবা কয়া অসি য়েংবদা লাইনা শাউরকপগী মওং অমা উবা ফংলি। মশী চেকশীন্নিঙায়নি হায়না চিফ মিনিষ্টরনা ফোঙদোকখি। রিলিফ কেম্প ৪২ হাংদোকখিবগা লোয়ননা নোংলৈ- নুংশিৎনা শোকহল্লবা ঈমূংশিং অদুদা খূদক্কি রিলিফ মেটরিয়েলশিং পীবা হৌখ্রে লোয়ননা লূপা ক্রোর তরুক কাইথোক্তুনা খুন্দা-লৈতাহন্ননবা থৌরাংসু লৌখৎলে হায়না চিফ মিনিষ্টরনা ফোঙদোকখি।মাঙ-তাকখ্র বা ঈমূংশিং অদুদি ইম্ফাল ইষ্ট তা য়ূম ৫৬০০, ইম্ফাল ৱেষ্ট তা ৬০৫৩,বিষ্ণুপুরদা ১১৭৯,থৌবাল দিষ্ট্রিক্টকি য়ূম ৮০০,ককচীংদা য়ূম ১২০,উখ্রূলদা য়ূম ২০০,তমেংলোংদা ১৩০,নোনেদা ১২০,কামজোংদা ১০০,চুরাচান্দ পুরদা ৫৪০,কাংপোকপিদা ২৯২,চান্দেলদা য়ূম ১৬ অমসুং তেংনৌপল দিষ্ট্রিক্টকি য়ূম ২৭৫ নি হায়না চিফ মিনিষ্টরনা ফোঙদোকখি।
