হন্দক নুমিৎ নীনিগী মতমসিদা অকনবা নোংলৈ-নুংশিৎনা চাউনা অমাঙ- অতা থোকহনখ্রবা মনিপুর অমসুং আসামদা সেন্টর লৈঙাক্না চাউনা মতেং পাংলগনি হায়না য়ুনিয়ন হোম মিনিষ্টর আমিট শাহানা অচেৎপা থাজবা পীখ্রে। বি জে পিগী থৌমীশিংনসু নোংলৈ- নুংশীৎকী অৱা-চৈথেং মায়োক্নরবা মীয়ামদা অঙম্বা মওংদা মতেং পাংশিন্ননবা মিনিষ্টর অসিনা খঙহনখি।
মাঙ-তাকখিবা কয়াদুগী মতাংদা ষ্টেট অনী অসিগী চিফ মিনিষ্টরশিংগা ৱারী শান্নখিবগা লোয়ননা সেন্টর লৈঙাক্না চাউনা মতেং পাংলগনি হায়না আমিট শাহানা অচেৎপা থাজবা পীখিবনি। মনিপুরদা হৌখিবা মার্চ ৩১ গী অয়ূক্তা শীৎখিবা অকনবা নোংলৈ-নুংশিৎনা তোঙান তোঙানবা মফমশিংদা য়ূম কয়ামরূম হুমদোক্তুনা অমাঙ অতা থোকহনখিবতা নত্তনা লুপা লাখ কয়ামরূম গী লন-থুম মাঙহনখি। থৌদোক অদুগা মরী লৈননা ব্রজ তারকপদা চহী তরাখক্তা ঙায়রিবা অঙাং অমসু লৈখিদবনি।
আসামগী ওইনসু সাউথ সলমারা মলকাচার দিষ্ট্রিক্ট মনূংচন্না অকনবা নোংলৈ-নুংশিৎনা অঙাং অমা শিহনখি অদুগা মীওই অনিসু থিবা খঙখিদবগী থৌদোক লৈরিবনি। মখোয় অনিনা ব্রম্মহপুত্রা তুরেলদা হি তোংদুনা চৎলিঙৈদা অকনবা নোংলৈ-নুংশিৎনা মরম ওইদুনা হি অদু মথক-মখা ওন্দুনা লূপখিবদগী লাইবক থীবা থৌদোক অদু মায়োক্নখিবনি হায়রি। নোংচুপ বেঙ্গলগী শরূক খরদসু অকনবা নোংলৈ-নুংশিৎ অদুনা চাউনা অমাঙ- অতা থোকহনখিবগী পাউ লৈরি।
