মোইরাং কেন্দ্রগী মনূংচন্না লৈরিবা ফীভম ফত্রবা লম্বীশিং চৎলিবা নোংজুথা অসী লোইশিল্লক্তুনা নোং তাবা লেপখিবগা অথুবা মতমদা শেম্বা হৌরগনি হায়না মোইরাং কেন্দ্রগী এম এল এ থোঙাম শান্তিনা মীয়ামদা লাউথোকখ্রে। হৌখিবা চহী কুনলোম শাবা লোইশিনবা ঙমদনা লৈরকখ্রবা, ফূবালা মখা মমাঙ ৱার্দ নম্বর ৪ দা শাবা কম্যুনিটি হোল অমা এম এল এ লোকেল এরিয়া দিভলপমেন্ট ফন্দ গী শেনফম থাধদুনা মপূংফানা শাবা লোইশিল্লক্তুনা ঙরাং শঙ্গাদুনা মীয়ামদা শিন্নখিবা থৌরমদা ৱা ঙাঙবদা এম এল এ শান্তি না ৱাফম অসী ফোঙদোকখিবনি।
ফূবালা মখা মমাঙ লৈকায়গী লম্বী অদুসু নোং হাংখিবগা কোইলাস থারগনি হায়রদুনা, ফূবালা অৱাং লৈকায়গী স্পোর্টস কমপ্লেক্স অদুসু খরা য়েৎনবা লৈবদগী সি বি আইনা কেস পায়দুনা লৈবদগী হৌজিক পন্থদুনা লৈনরিবনি। কেস অসি লোইশিনবগা অথূবা মতমদা শেমগৎলগনি হায়না শান্তিনা ফোঙদোকখি।
মোইরাং কংলৈরোলগী ৱারীদা য়াওরিবা কুঞ্জমালা হায়রগা খঙনরিবা কুঞ্জলেম্বী অমসুং ককয়েন শুজা অথৌবগী খুভম অমসু ফুবালাদা শেমগত্তুনা থম্ননবা হোৎনরগনি হায়না এম এল এনা মখা তানা ফোঙদোকখি। মমাঙ চহীগী মে অহুমদগী থোক্লিবা হীংশাগী ঈরাং অসীদা খুদোংচাদবা কয়া মায়োক্নরবসু মোইরাং কেন্দ্র গী ওইনদি চিফ মিনিষ্টরনা অহেনবা মীৎয়েং চঙবিদুনা চাওখৎ থৌরাংগী থবকশিং লেপ্তনা পায়খৎলি হায়নসূ মহাক্না মখা তানা ফোঙদোকখি।
